គិតមកដល់ពេលនេះ មជ្ឈមណ្ឌលការងារចល័តរបស់ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នៅតែ​បន្តសកម្មភាព​ចុះផ្សព្វផ្សាយ​ឱកាស​ការងារ​នៅ​តាម​សាកលវិទ្យាល័យ និងគ្រឹះស្ថានសិក្សានានា។ បន្ថែមពីនេះ ក៏បានចុះផ្សព្វ​ផ្សាយ​នៅ​តាម​បណ្តា​រាជធានី ខេត្ត ដើម្បីផ្តល់ព័ត៌មានអំពីទីផ្សារការងារ ក៏ដូចជាការនាំយក​ឱកាសការងារ​ឲ្យ​កាន់​តែ​ខិតជិតដល់យុវជន និងអ្នកស្វែងរកការងារ។

មន្រ្តីទីភ្នាក់ងារជាតិមុខរបរ និងការងារ នៅព្រឹកថ្ងៃទី២០ ឧសភា ឆ្នាំ២០២៤នេះ បានឲ្យព័ត៌មាន ប៊ីធីវី ដឹងថា ថ្ងៃនេះមជ្ឈមណ្ឌលការងារចល័តចំនួន២ បានចេញដំណើរទៅកាន់ខេត្តសៀមរាប ដើម្បី​ផ្តល់ព័ត៌មានអំពីទីផ្សារការងារ ក៏ដូចជាការនាំយកឱកាសការងារជាច្រើនកន្លែងដល់យុវជន និង​អ្នក​ស្វែងរកការងារ ដើម្បីបង្កើនលទ្ធភាពនៃការទទួលបានការងារកាន់តែឆាប់រហ័ស។

មន្រ្តីដដែលនេះ បានឲ្យដឹងទៀតថា ក្រៅពីផ្សព្វផ្សាយព័ត៌មានការងារនេះដែរ ក៏នឹង​មាន​រៀបចំ​សិក្ខា​សាលា​ស្តីពី៖ "ការត្រៀមលក្ខណៈសម្បត្តិក្នុងការស្វែងរកការងារ" និងផ្សព្វផ្សាយកម្ម​វិធី​បណ្តុះ​បណ្តាល​ជំនាញបច្ចេកទេស និងវិជ្ជាជីវៈដល់យុវជនមកពីគ្រួសារក្រីក្រ និងគ្រួសារ​ងាយ​រង​ហានិភ័យ​ចំនួន ១,៥លាននាក់ ដើម្បីឆ្លើយតបទៅនឹងតម្រូវការទីផ្សារបច្ចុប្បន្ន និងទៅអនាគត។

យោងតាមកាលវិភាគរបស់មជ្ឈមណ្ឌលការងារចល័ត NEA ការផ្សព្វផ្សាយ​ឱកាស​ការងារ​នៅ​តាម​សាកល​វិទ្យាល័យ និងគ្រឹះស្ថានសិក្សានានា សម្រាប់ថ្ងៃទី២១ ខែឧសភាស្អែកនេះ រួមមាន៖ សាកលវិទ្យាល័យភូមិន្ទភ្នំពេញ , សាកលវិទ្យាល័យអាស៊ី អឺរ៉ុប , វិទ្យាស្ថានជាតិសង្គមកិច្ច , សាកលវិទ្យាល័យធនធានមនុស្ស និងសាកលវិទ្យាល័យកម្ពុជា។

សូមបញ្ជាក់បន្ថែមថា ក្រៅពីការងារចុះផ្សព្វផ្សាយខាងលើនេះ ទីភ្នាក់ងារជាតិមុខរបរ និងការងារ នឹង​បន្ត​រៀបចំវេទិកាការងារ ពិព័រណ៍ការងារ និងកិច្ចសម្ភាសការងារជាប្រចាំ ដើម្បីបង្កើត​ជា​កន្លែង​ជួប​ជុំគ្នាដោ​យងាយស្រួលរវាងអ្នកស្វែងរកការងារធ្វើ និងនិយោជក​ដែល​កំពុង​ត្រូវ​ការ​ជ្រើសរើស​បុគ្គលិក អាចពិភាក្សា និងស្វែងយល់អំពីតម្រូវការជំនាញនៅក្នុងទីផ្សារការងារ៕ អត្ថបទ៖ ឈិត បូរ៉ាវី