នៅថ្ងៃទី២០ ខែឧសភានេះ បណ្តាសាលាបណ្តុះបណ្តាលជំនាញវិជ្ជាជីវៈTVET របស់​ក្រសួង​ការងារ បណ្តុះបណ្តាលវិជ្ជាជីវៈ បានរៀបចំប្រឡង​ធ្វើ​តេស្ត​សមត្ថភាព​សិស្ស​បញ្ចប់​វគ្គ​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេសកម្រិត១ C1 នៃកម្មវិធីការផ្តល់​អាហា​រូបករណ៍​រាជ​រដ្ឋាភិបាល សម្រាប់ការបណ្តុះបណ្តាលជំនាញវិជ្ជាជីវៈជូនយុវជន ១លាន៥សែននាក់។

សិស្សានុសិស្សនៃវិទ្យាស្ថានពហុបច្ចេកទេសព្រះកុសុមៈ PPI បានថ្លែងប្រាប់ BTV ថា ក្រោយ​ពី​ពួក​គេ​បានរៀនទ្រឹស្តី និងការអនុវត្តផ្ទាល់នៅក្នុងសាលា ព្រមទាំង​បាន​រៀន​ធ្វើ​ការងារ​ហាត់​ការ​នៅ​ក្រុមហ៊ុន នៅក្នុងកម្មវិធីផ្តល់អាហារូបករណ៍រាជរដ្ឋាភិបាល ១,៥ លាននាក់ បានរយៈពេ​ល៤​ខែ​មក ពួកគេអាចមានសមត្ថភាពមានជំនាញមួយច្បាស់លាស់។ ដូច្នេះនៅ​ថ្ងៃ​នេះ​ពួក​គេបាន​ចូល​ប្រឡង​សញ្ញាបត្រកម្រិត១ C1 ដើម្បី បញ្ចប់ការសិក្សា និងបន្តទៅស្វែង​រក​ការងារ​ធ្វើ​នា​ពេល​នៅ​ពេល​ខាង​មុខ។

លោក មែ សុមាលី តំណាងវិទ្យាស្ថាន PPI ថ្លែងថា នៅថ្ងៃនេះ សាលា PPI បានបើក​ការ​ប្រឡង​ធ្វើ​តេស្ត​សមត្ថភាពបញ្ចប់វគ្គបណ្តុះបណ្តាលជំនាញវិជ្ជាជីវៈកម្រិត១ សម្រាប់សិស្ស​ដែល​បាន​ជ្រើស​រើស​ពេលសិក្សាចំនួន៤ខែ ហើយនៅក្នុងដំណើរការប្រឡងតេស្តវាយតម្លៃសមត្ថភាពនេះ គឺ​មានការចូលរួមសង្កេតការណ៍ផ្ទាល់ពីក្រសួងការងារ និងក្រុមហ៊ុននានា ដែល​មាន​តម្រូវ​ការ​បុគ្គលិក កម្មករនិយោជិកចូលហាត់ការ និងធ្វើការងារផងដែរ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បា​ន​ថ្លែងថា សម្រាប់គោលដៅរាជធានីភ្នំពេញ នៅថ្ងៃទី២០ ខែឧសភានេះ គឺមានសាលា TVET ចំនួន​២ រួមមាន៖ វិទ្យាស្ថានពហុបច្ចេកទេសព្រះកុសុមៈ PPI និងវិទ្យាស្ថានសហគ្រិន និង​នវា​នុវត្តន៍ NIEI បានបើកការប្រឡងបញ្ចប់វគ្គបណ្តុះបណ្តាលជំនាញវិជ្ជាជីវៈកម្រិត C1 ហើយ​ព្រម​ជាមួយ​គ្នានេះ ឯកឧត្តម ក៏បានអំពាវនាវឲ្យយុវជននានាទៀត ជាពិសេសយុវជនមកពីគ្រួសារក្រី និង​គ្រួសារងាយរងហានីភ័យ សូមនាំគ្នាចុះឈ្មោះរៀនជំនាញវិជ្ជាជីវៈ និងបច្ចេក​ទេស​នៅ​តាម​បណ្តា​សាលា TVET ងាយស្រួលរកការងារឆាប់បានធ្វើ និងស្របពេល​រាជ​រដ្ឋាភិបាល​កំពុង​អនុវត្ត​គោល​នយោបាយផ្តល់អាហារូបករណ៍ ផ្តល់ការបណ្តុះ​បណ្តាល​ជំនាញ​វិជ្ជា​ជីវៈ​ដោយ​មិន​មាន​គិត​ថ្លៃ​ជូនយុវជនចំនួន១លាន៥សែននាក់៕ អត្ថបទ ស៊ុមសុខជា