សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់ភាគីពាក់ព័ន្ធ ត្រូវមានការឯកភាពគ្នាក្នុងការចងក្រងឯកសាពាក់ព័ន្ធ នឹងរបបប្រល័យពូជសាសន៍ ដែលជាកិច្ចការដ៏សំខាន់ សម្រាប់ការអប់រំដល់កូនខ្មែរជំនាន់ក្រោយ។

សម្ដេចធិបតី នាយករដ្ឋមន្រ្ដីមានប្រសាសន៍ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់បើកសន្និសីទស្តីពី «អនាគតកម្ពុជាគ្មានអំពើប្រល័យ​ពូជសាសន៍» នៅព្រឹកថ្ងៃទី២០ ខែឧសភា ឆ្នាំ២០២៤នេះ ថា អនាគតរបស់ប្រទេសមួយ គឺពឹងផ្អែក​លើ​ឆន្ទៈរបស់ប្រទេសនោះ ក្នុងការប្រឈមមុខជាមួយ​នឹងអតីតកាល ប៉ុន្ដែដើម្បីធ្វើបែបនេះ​បានលុះត្រាតែប្រជាជាតិនោះមានការឯកភាពគ្នាលើការបកស្រាយអំពីអតីកាលនូវព្រឹត្តិការណ៍ប្រវត្តិសាស្រ្ដសំខាន់ៗ​ ដែលទាក់ទងនឹងសង្គ្រាម និងសន្ដិភាពរបស់ប្រទេស។

សម្ដេចធិបតីបញ្ជាក់ថា ​សម្រាប់ប្រទេសកម្ពុជា ប្រវត្តិសាស្រ្ដទាក់ទងនឹងថ្ងៃរំដោះ ៧ មករា ១៩៧៩ ការ​ចុះហត្ថលេខាលើកិច្ចព្រមព្រៀងសន្ដិភាពទីក្រុងបារីស ២៣ តុលា ១៩៩១ និងការសម្រេច​បាននូវ​សន្ដិភាពពេញលេញទាំងស្រុងតាមរយៈនយោបាយឈ្នះឈ្នះ ​នៅថ្ងៃទី២៩ ខែធ្នូ ឆ្នាំ ១៩៩៨ ដែលមានសម្ដេចតេជោ ជាស្ថាបនិកមគ្គុទេសក៍ឯក ត្រូវតែមានការបកស្រាយតែមួយ​នឹងមានភាពរឹងមាំ ដើម្បីជៀសវាងការប្រឌិតរឿងរ៉ាវផ្សេងៗដើម្បីតែកេងចំណេញ​នយោបាយដោយ​បំពានលើយុត្តិធម៌របស់ជនរងគ្រោះ ពីអំពើប្រល័យពូជសាសន៍ ក៏ដូចជាកិច្ចខិតខំប្រឹងប្រែង​បង្រួបបង្រួមជាតិរបស់កម្ពុជា។

សូមជម្រាបថា ថ្ងៃនេះ ជាទិវាជាតិនៃការចងចាំ ២០ ឧសភា ដែលជាថ្ងៃប្រជាជនកម្ពុជាគ្រប់ៗរូបចង​ចាំមិនអាចបំភ្លេចបាន ក្នុងរបបកម្ពុជាប្រជាធិបតេយ្យ ​ឬហៅថារបបប្រល័យពូជសាសន៍ ប៉ុល ពត (១៧ មេសា ១៩៧៥ - ៦ មករា ១៩៧៩) ដែលជារបបដ៏ឃោរឃៅ និងខ្មៅងងឹត។ ទិវានេះជាការ​រំលឹក​ដល់វិញ្ញាណក្ខន្ធដល់ជនរងគ្រោះជាង៣លាននាក់ដែលបានស្លាប់បាត់បង់ជីវិត នៅក្នុងរបប​ប្រល័យពូជសាសន៍ ប៉ុល ពត។

ប្រជាពលរដ្ឋកម្ពុជាភាគច្រើនលើសលប់បានដឹង ​និងបានយល់ច្បាស់ អំពីរឿងរ៉ាវសោកនាដកម្ម​ដ៏ជូរចត់ ​ដែលប្រជាពលរដ្ឋខ្មែរបានឆ្លងកាត់ជិត៣ទសវត្សរ៍ ក្នុងភ្នក់ភ្លើងសង្គ្រាម ​និងទឹកភ្នែក ការកាប់សម្លាប់ ការបំផ្លិចបំផ្លាញ​ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យ​ធ្វើការដូចសត្វធាតុជាដើម។ មិនតែប៉ុណ្ណោះប្រជាពលរដ្ឋកម្ពុជា ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មាន​លទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមាន​ពីកំណើត​របស់មនុស្សក៏គ្មានដែរ។​ ដូច្នេះដើម្បីកុំឱ្យរបបនេះវិលត្រឡប់មកវិញ ប្រជាពលរដ្ឋខ្មែរបានប្ដេជ្ញា​ចូលរួម​ថែរក្សាការពារសន្តិភាពឱ្យបានគង់វង្ស ពីព្រោះសន្តិភាពបានផ្តល់ឱកាសគ្រប់យ៉ាងក្នុងការ​កសាង​សង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត៕ អត្ថបទ៖ វ៉ន ដារ៉ា