នៅក្នុងទីក្រុងម៉ាឌ្រីដ រដ្ឋមន្ត្រីអ៊ីស្រាអែលកាលពីថ្ងៃអាទិត្យ បានរិះគន់ផែនការរបស់នាយករដ្ឋមន្ត្រីអេស្ប៉ាញលោក Pedro Sanchez ក្នុងការទទួលស្គាល់រដ្ឋប៉ាឡេស្ទីន ដោយនិយាយថា ការធ្វើបែបនេះ នឹង ផ្តល់ «រង្វាន់» ដល់ការវាយប្រហារដែលធ្វើឡើងដោយក្រុមហាម៉ាសប្រឆាំងនឹងអ៊ីស្រាអែល។

រដ្ឋមន្ត្រីទទួលបន្ទុកកិច្ចការជនភៀសខ្លួនរបស់អ៊ីស្រាអែល លោក Amichai Chikli បាននិយាយនៅក្នុងកិច្ចប្រជុំនៃមេដឹកនាំស្តាំនិយមសកលនៅទីក្រុងម៉ាឌ្រីដ ដែលរៀបចំដោយគណបក្ស Vox របស់ប្រទេសអេ ស្ប៉ាញ។

លោកបានថ្លែងប្រាប់កិច្ចប្រជុំនោះថា៖«ជាអកុសល នាយករដ្ឋមន្ត្រីអេស្ប៉ាញបច្ចុប្បន្ន លោក Sanchez ជឿថា ប៉ាឡេស្ទីន គួរតែទទួលបានរង្វាន់សម្រាប់ការសម្លាប់រង្គាលដែលនេះ គឺជាពេលវេលា ដើម្បីផ្តល់ឲ្យ ពួកគេនូវរដ្ឋមួយ»។

អេស្ប៉ាញ គឺជាប្រទេសមួយក្នុងចំណោមអ្នករិះគន់ខ្លាំងបំផុតរបស់អឺរ៉ុបចំពោះការវាយលុក នៅតំបន់ហ្កា ហ្សារបស់អ៊ីស្រាអែល ដែលបានចាប់ផ្តើមនៅថ្ងៃទី៧ ខែតុលា បន្ទាប់ពីក្រុមសកម្មប្រយុទ្ធហាម៉ាស់ បានបើកការវាយប្រហារយ៉ាងសាហាវរបស់ពួកគេ ទៅកាន់អ៊ីស្រាអែលភាគខាងត្បូង។

កាលពីខែមីនា លោក Sanchez បាននិយាយថា អេស្ប៉ាញ និងអៀរឡង់ រួមជាមួយស្លូវេនី និងម៉ាល់តា បានយល់ព្រមចាត់វិធានការដំបូងរបស់ពួកគេឆ្ពោះទៅរកការទទួលស្គាល់រដ្ឋប៉ាឡេស្ទីនជាមួយអ៊ីស្រាអែល ដោយមើលឃើញថា ដំណោះស្រាយរដ្ឋពីរ មានសារៈសំខាន់សម្រាប់សន្តិភាពយូរអង្វែង។

នាយករដ្ឋមន្រ្តីសង្គមនិយមរូបនេះ គ្រោងនឹងប្រកាសនៅថ្ងៃពុធអំពីកាលបរិច្ឆេទដែលម៉ាឌ្រីដ នឹងទទួលស្គាល់រដ្ឋប៉ាឡេស្ទីនរួមជាមួយដៃគូសហភាពអឺរ៉ុបមួយចំនួន។