កូរ៉េខាងត្បូង និងចក្រភពអង់គ្លេសនឹងធ្វើជាសហម្ចាស់ផ្ទះនៃកិច្ចប្រជុំកំពូលបញ្ញាសិប្បនិមិត្ត (AI) ពិភពលោកលើកទី២ នៅទីក្រុងសេអ៊ូល ក្នុងសប្តាហ៍នេះ ខណៈដែលល្បឿនដ៏គួរឲ្យស្ងើចនៃនវានុវត្តន៍នេះ គិតចាប់តាំងពីមានកិច្ចប្រជុំកំពូល AI លើកដំបូង ក្នុងខែវិច្ឆិកា ធ្វើរដ្ឋាភិបាលនានាមានការលំបាក ក្នុងការទប់ទល់នឹងហានិភ័យដែលកំពុងកើនឡើងជាលំដាប់។

នាយករដ្ឋមន្ត្រីអង់គ្លេស លោក Rishi Sunak និងប្រធានាធិបតីកូរ៉េខាងត្បូង លោក Yoon Suk-yeol នឹងត្រួតពិនិត្យកិច្ចប្រជុំកំពូលនិម្មិតនេះ នៅថ្ងៃទី២១ ខែឧសភា ចំពេលមានការអំពាវនាវឲ្យមានបទប្បញ្ញត្តិប្រសើរជាងនេះ ដើម្បីគ្រប់បញ្ញាសិប្បនិមិត្ត ឬ AI បើទោះបីជាមានការខ្វែងគំនិតគ្នាយ៉ាងខ្លាំងក្លាលើរបៀបដែលបច្ចេកវិទ្យានេះអាចប៉ះពាល់ដល់មនុស្សជាតិក៏ដោយ។

នៅក្នុងអត្ថបទមតិរួមមួយដែលត្រូវបានចេញផ្សាយ នៅលើទំព័រសារព័ត៌មាន i (អាយ) របស់ចក្រភពអង់គ្លេស និង JoongAng Ilbo របស់កូរ៉េខាងត្បូង ដែលមានចំណងជើងថា «មានតែស្តង់ដារ AI សកលប៉ុណ្ណោះ ទើបអាចបញ្ឈប់ការប្រណាំងប្រជែងឲ្យដល់កម្រិតទាប» នោះ លោក Sunak និងលោក Yoon បានលើកឡើងថា៖ «ទោះបីជាកិច្ចខិតខំប្រឹងប្រែងជាវិជ្ជមានត្រូវបានធ្វើឡើង ដើម្បីរៀបចំអភិបាលកិច្ចលើ AI សកលក៏ដោយ ក៏គម្លាតធំៗ នៅតែមានដដែល»។

គួរបញ្ជាក់ថា ព្រឹត្តិការណ៍ខែវិច្ឆិកាត្រូវបានចាត់ទុកថា ជាកិច្ចប្រជុំកំពូលសុវត្ថិភាព AI ប៉ុន្តែទំហំនៃបញ្ហាប្រឈម បានរីកកាន់តែធំឡើងៗ ចាប់តាំងពីពេលនោះមក។ បើយោងតាមគេហទំព័ររបស់កិច្ចប្រជុំកំពូលនេះ បានឲ្យដឹងថា កិច្ចប្រជុំដែលត្រូវចាប់ផ្តើមនៅថ្ងៃទី២១ ខែឧសភា ឥឡូវនេះ ត្រូវបានចាត់ទុកថា ជាកិច្ចប្រជុំកំពូលសេអ៊ូល AI (AI Seoul Summit) ហើយនឹងពិភាក្សាអំពីអាទិភាពចំនួន៣ ដែលមានសុវត្ថិភាព នវានុវត្តន៍ និងការរួមបញ្ចូល AI៕