បេក្ខជនប្រធានាធិបតីសំខាន់ៗរបស់ប្រទេសម៉ិកស៊ិក បានជួបជុំគ្នា កាលពីយប់ថ្ងៃអាទិត្យ (ទី១៩ ខែឧសភា) នៅក្នុងកម្មវិធីជជែកដេញដោលដែលផ្តោតលើបញ្ហាសន្តិសុខ ដោយគណបក្សកាន់អំណាចសង្ឃឹមថា នឹងការពារគោលនយោបាយរបស់ប្រធានាធិបតីជិតផុតអាណត្តិ បើទោះបីជាគូប្រជែងសំខាន់ បានរិះគន់យ៉ាងចាស់ដៃ ចំពោះកំណត់ត្រាខ្ពស់បំផុតនៃឧក្រិដ្ឋកម្មហិង្សាក៏ដោយ។

អតីតអភិបាលក្រុងម៉ិកស៊ីកូ លោកស្រី Claudia Sheinbaum មកពីគណបក្សឆ្វេងនិយមដែលកំពុងកាន់អំណាច គឺ Morena បានសន្យាបន្តជាមួយនឹងគោលនយោបាយសន្តិសុខ ដែលមិនមានការប្រឈមមុខដាក់គ្នាយ៉ាងទូលំទូលាយរបស់អ្នកណែនាំរបស់លោកស្រី គឺប្រធានាធិបតី លោក Andres Manuel Lopez Obrador ខណៈពេលលោក ក៏បង្ហាញពីកំណត់ត្រាប្រយុទ្ធប្រឆាំងនឹងឧក្រិដ្ឋកម្មរបស់លោកស្រី ក្នុងនាមជាមេដឹកនាំរដ្ឋធានីដ៏ធំនេះ។

ដោយលើកហេតុផលថា អត្រាឃាតកម្មបានធ្លាក់ចុះ នៅពេលដែលលោកស្រី បានជួលនគរបាលបន្ថែមទៀត ខណៈពេលដែលគាំទ្រកម្មវិធីសង្គមដែលសំដៅទៅលើអ្វីដែលលោកស្រីពិពណ៌នាថា ជាការបន្ធូរបន្ថយមូលហេតុសំខាន់ៗនៃឧក្រិដ្ឋកម្មនោះ លោកស្រី Sheinbaum បាននិយាយថា៖ «ខ្ញុំគឺជាមនុស្សតែម្នាក់គត់ដែលអាចបង្ហាញពីលទ្ធផលសន្តិសុខ» ។

គួបញ្ជាក់ថា លោកស្រី Sheinbaum ជាអ្នកវិទ្យាសាស្ត្រម្នាក់ បានគ្រប់គ្រងទីក្រុងម៉ិកស៊ីកូ ពីឆ្នាំ២០១៨ ដល់ឆ្នាំ២០២៣ នៅពេលដែលលោកស្រី បានចុះចេញពីតំណែង ដើម្បីឈរឈ្មោះជាប្រធានាធិបតី។

យ៉ាងណាក្ដី គូប្រជែងដ៏ធំរបស់លោកស្រី គឺលោកស្រី Xochitl Galvez បានជំទាស់នឹងកំណត់ត្រារបស់លោកស្រី Sheinbaum ក្នុងឋានៈជាអភិបាលក្រុង ដោយអះអាងថា ឃាតកម្មពិតជាបានកើនឡើងដោយសារតែចំនួនអ្នកស្លាប់ខ្ពស់ជាងអ្វីដែលត្រូវបានបង្ហាញជាផ្លូវការ។

លោកស្រី Galvez សមាជិកព្រឹទ្ធសភាដែលតំណាងឲ្យក្រុមចម្រុះកណ្ដាលនិយម ដែលធ្លាប់គ្រប់គ្រងនយោបាយម៉ិកស៊ិក បានវាយប្រហារម្តងហើយម្តងទៀតលើគណបក្សកាន់អំណាចថា បានធ្វើមិនដឹងមិនឮពីការមិនគោរពច្បាប់ ជាពិសេសឧក្រិដ្ឋកម្មហិង្សាដែលបង្កឡើងដោយក្រុមឧក្រិដ្ឋជនគ្រឿងញៀនដ៏មានឥទ្ធិពលរបស់ប្រទេសនេះ៕