នាយករដ្ឋមន្ត្រីក្រិក លោក Kyriakos Mitsotakis បានជំរុញសហភាពអឺរ៉ុប (EU) ធ្វើឲ្យការចំណាយខ្ពស់ធ្លាក់ចុះឲ្យបានឆាប់តាមដែលអាចធ្វើទៅបាន ដោយលោកបានចាត់ទុកថា នេះជាបញ្ហាប្រឈមនយោបាយដ៏ធំមួយ នៅមុនការបោះឆ្នោតសភាអឺរ៉ុប។

ប្រជាជនអឺរ៉ុបរាប់លាននាក់ មានកំហឹងនឹងការធ្លាក់ចុះស្ដង់ដារជីវភាពរស់នៅ ហើយនេះត្រូវបានគេរំពឹងថា នឹងធ្វើឲ្យប៉ះពាល់ដល់ការគាំទ្រសម្រាប់បណ្ដាគណបក្សសំខាន់ៗ នៅក្នុងការបោះឆ្នោត នាថ្ងៃទី ៦-៩ ខែមិថុនា ដើម្បីជ្រើសរើសសមាជិកសភា ៧២០រូបរបស់សភា EU។

នៅក្នុងលិខិត កាលពីថ្ងៃទី១៨ ខែឧសភា ដែលផ្ញើទៅកាន់ប្រធានគណៈកម្មការអឺរ៉ុប លោកស្រី Ursula von der Leyen មេដឹកនាំគណបក្សអភិរក្សនិយមក្រិក បានលើកឡើងថា អតិផរណាបានបង្ហាញពីបញ្ហា ក្នុងដំណើរការទីផ្សារ ដែលនាំឲ្យមានភាពល្អៀងនៃតម្លៃទំនិញសំខាន់ៗ នៅទូទាំងប្លុក ដែលមានសមាជិក ២៧ប្រទេសនេះ។

លោកបានប្រាប់ថា នៅក្នុងប្រទេសក្រិក និងប្រទេសផ្សេងទៀត ដែលរួមមានបែលហ្ស៊ិក ក្រូអាត សាធារណរដ្ឋឆែក ដាណឺម៉ាក និងស្លូវ៉ាគី ទំនិញប្រើប្រាស់សំខាន់ៗដែលផលិតដោយក្រុមហ៊ុនចម្រុះជាតិសាសន៍ ត្រូវបានលក់ក្នុងតម្លៃខ្ពស់មិនសមរម្យ បើធៀបនឹងប្រទេសសមាជិក EU ផ្សេងទៀត។

លោកបានបន្ថែមថា មូលហេតុមួយ ក្នុងចំណោមមូលហេតុចម្បងជាច្រើន គឺដោយសារក្រុមហ៊ុនពហុជាតិ បានដាក់កំហិតការផ្គត់ផ្គង់ដែនដី (TSC) លើទីផ្សាររបស់រដ្ឋជាសមាជិក EU ដើម្បីទាញយកផលប្រយោជន៍ពីទីតាំងសំខាន់របស់ពួកគេ។ EU ចាំបាច់ត្រូវបង្ហាញថា ខ្លួនអាច «ធ្វើអន្តរាគមន៍យ៉ាងដាច់ខាត រហ័ស និងប្រកបដោយប្រសិទ្ធភាព» ដើម្បីដោះស្រាយបញ្ហាបែបនេះ៕