រដ្ឋមន្ត្រីការពារជាតិ លោក យ៉ូអាវ ហ្គាឡែនធ៍ ( Yoav Gallant) នៅថ្ងៃចន្ទនេះ បានប្រាប់ទីប្រឹក្សា ប្រធានាធិបតីអាមេរិក លោក បៃដិន (Joe Biden) ដែលបានព្រមានប្រឆាំងនឹងសកម្មភាពសំខាន់ៗ នៅក្នុងទីក្រុងហ្កាហ្សា ភាគខាងត្បូង ដែលអាចប្រថុយនឹងការស្លាប់ជនស៊ីវិលយ៉ាងច្រើនថា         អ៊ីស្រាអែល មានបំណងពង្រីកប្រតិបត្តិការយោធារបស់ខ្លួន នៅក្នុងទីក្រុងរ៉ាហ្វា។ 

អ៊ីស្រាអែលពណ៌នាទីក្រុងរ៉ាហ្វាដែលស្ថិតនៅជាប់ព្រំដែនហ្កាហ្សាស្ទ្រីបជាមួយឧបទ្វីបស៊ីណៃ ( Sinai) របស់អេហ្ស៊ីប ជាបន្ទាយចុងក្រោយរបស់ក្រុមឥស្លាមនិយមហាម៉ាស ហើយសមត្ថភាពគ្រប់គ្រង និងប្រយុទ្ធរបស់ក្រុមនេះដែលខ្លួនបានព្យាយាមរុះរើអំឡុងសង្គ្រាមជាង៧ខែនេះ។

បន្ទាប់ពីមានការខ្វែងគំនិតគ្នាជាសាធារណៈជាច្រើនសប្តាហ៍ជាមួយទីក្រុងវ៉ាស៊ីនតោនជុំវិញផែនការទីក្រុងរ៉ាហ្វា អ៊ីស្រាអែលកាលពីថ្ងៃទី ៦ ខែឧសភា បានបញ្ជាឲ្យជនស៊ីវិលប៉ាឡេស្ទីនជម្លៀសផ្នែកខ្លះនៃទីក្រុង នេះ ហើយបានចាប់ផ្តើមការលុកលុយរបស់កងទ័ព និងរថក្រោះ។

សេចក្តីថ្លែងការណ៍មួយពីការិយាល័យរបស់លោក ហ្គាឡែនធ៍  បានដកស្រង់សម្តីលោក ខណៈដែលបានប្រាប់ទីប្រឹក្សាសន្តិសុខជាតិអាមេរិកលោក Jake Sullivanថា៖«យើងប្តេជ្ញាពង្រីកប្រតិបត្តិការជើងគោក នៅទីក្រុងរ៉ាហ្វា រហូតដល់ចុងបញ្ចប់នៃការរុះរើក្រុមហាម៉ាស និងសង្គ្រោះចំណាប់ថ្នូរទាំងអស់ត្រឡប់មកវិញ»។

អ៊ីស្រាអែលជឿថា ចំណាប់ថ្នូររាប់សិបនាក់ពីការវាយឆ្មក់របស់ក្រុមហាម៉ាសឆ្លងព្រំដែនកាលពីថ្ងៃទី៧ ខែតុលា កំពុងត្រូវបានឃុំខ្លួន នៅក្នុងទីក្រុងរ៉ាហ្វា។