នគរបាលក្នុងរដ្ឋដែលមានប្រជាជនច្រើនជាងគេបំផុតរបស់ប្រទេសអូស្ត្រាលី នៅថ្ងៃចន្ទ (ទី២០ ខែឧសភា) នេះ បានប្រកាសថា ក្នុងប្រតិបត្តិការរយៈពេល ៤ថ្ងៃ ពួកគេបានចាប់ខ្លួន និងចោទប្រកាន់ជនសង្ស័យចំនួន ៥៥៤នាក់ ពាក់ព័ន្ធនឹងអំពើហិង្សាក្នុងគ្រួសារ ខណៈប្រទេសនេះកំពុងយកចិត្តទុកដាក់ ចំពោះការវាយប្រហារដ៏លេចធ្លោជាបន្តបន្ទាប់លើស្ត្រី។

នគរបាលរបស់រដ្ឋ New South Wales បាននិយាយថា «ជនល្មើសមួយចំនួន ដែលប្រព្រឹត្តអំពើហិង្សាក្នុងគ្រួសារដ៏អាក្រក់បំផុត» នៅក្នុងរដ្ឋនេះ ត្រូវបានបង្រ្កាប ក្នុងនោះរួមទាំងបុរសម្នាក់ដែលបានវាយដំលើស្ត្រីម្នាក់ បណ្តាលឲ្យបាក់ឆ្អឹងជំនី របួសផ្ទៃមុខ និងប៉ះពាល់តម្រងនោមផងដែរ។

ការចាប់ខ្លួននេះកើតឡើង នៅពេលដែលអូស្ត្រាលីប្រឹងប្រែងដោះស្រាយនឹងអត្រាស្លាប់ដោយហិង្សារបស់ស្ត្រីចំនួន ២៨នាក់ ក្នុងឆ្នាំ២០២៤ ដែលជាមធ្យមមានអ្នកស្លាប់រៀងរាល់ ៤ថ្ងៃម្នាក់។ មានស្ត្រីតែ ១៤នាក់ប៉ុណ្ណោះដែលបានស្លាប់ក្នុងរយៈពេលដូចគ្នា កាលពីឆ្នាំ២០២៣។

គួរបញ្ជាក់ថា ការវាយប្រហារជាបន្តបន្ទាប់លើស្ត្រី ដែលក្នុងនោះរួមទាំងការចាក់ស្ត្រីចំនួន ៥នាក់ នៅផ្សារទំនើប Bondi បានធ្វើឲ្យមានការយកចិត្តទុកដាក់លើយេនឌ័រ និងអំពើហិង្សាក្នុងគ្រួសារ។ នាយករដ្ឋមន្ត្រីអូស្ត្រាលីលោក Anthony Albanese បានហៅវាថា ជា «វិបត្តិជាតិ» ខណៈពេលដែលបានប្រកាសពីវិធានការ ដើម្បីទប់ស្កាត់រូបភាពអាសអាភាសក្លែងក្លាយ និងបង្កើនមូលនិធិ សម្រាប់ស្ត្រីដែលគេចចេញពីទំនាក់ទំនងរំលោភបំពាន៕