លោកស្រី Stella Assange ដែលជាភរិយារបស់ស្ថាបនិកគេហទំព័រ WikiLeaks គឺលោក Julian Assange បាននិយាយនៅថ្ងៃចន្ទ (ទី២០ ឧសភា) នេះថា ពួកគេនឹងងាកទៅរកតុលាការសិទ្ធិមនុស្សអឺរ៉ុបវិញ ដើម្បីឲ្យចេញដីកាបង្គាប់បន្ទាន់រារាំងការនិរទេស ប្រសិនបើតុលាការមិនសម្រេច នៅថ្ងៃនេះ។

លោកស្រី Stella បាននិយាយទៅកាន់ប្រព័ន្ធផ្សព្វផ្សាយនៅខាងក្រៅតុលាការជាន់ខ្ពស់របស់ទីក្រុងឡុងដ្រ៍ ប្រទេសអង់គ្លេស ជាកន្លែងដែលអ្នកតវ៉ារាប់រយនាក់ បានប្រមូលផ្តុំគ្នា ដើម្បីបានដឹងថា តើលោក Julian Assange នឹងត្រូវបានធ្វើបត្យាប័នទៅកាន់សហរដ្ឋអាមេរិក ពាក់ព័ន្ធនឹងការធ្វ់ឲ្យលេចធ្លាយនូវឯកសារសម្ងាត់របស់សហរដ្ឋអាមេរិក ដែលជាចំណុចបញ្ចប់នៃការតស៊ូផ្លូវច្បាប់រយៈពេល ១៣ឆ្នាំដែរ ឬយ៉ាងណា។

ចៅក្រម ២រូប នឹងប្រកាសថា តើពួកគេនឹងបំពេញតាមការធានារបស់សហរដ្ឋអាមេរិក ដែលថា លោក Assange វ័យ ៥២ឆ្នាំ នឹងមិនប្រឈមជាមួយការកាត់ទោសប្រហារជីវិត ហើយអាចផ្អែកលើសិទ្ធិវិសោធនកម្មលើកទី១ ដើម្បីនិយាយដោយសេរីដែរ ឬយ៉ាងណា ប្រសិនបើលោកត្រូវបានគេកាត់ទោសពីបទធ្វើចារកម្ម នៅសហរដ្ឋអាមេរិក។

ក្រុមអ្នកច្បាប់របស់លោក Assange និយាយថា កូនក្ដីរបស់ពួកគេអាចធ្វើដំណើរតាមយន្តហោះឆ្លងកាត់មហាសមុទ្រអាត្លង់ទិក ក្នុងរយៈពេល ២៤ម៉ោង បន្ទាប់ពីមានការសម្រេច ប៉ុន្តែថា រូបលោកក៏អាចត្រូវបានដោះលែងពីពន្ធនាគារ ឬក៏រូបលោកនៅតែជាប់នៅក្នុងការតស៊ូផ្លូវច្បាប់ជាច្រើនខែជាថ្មីម្ដងទៀត។

នាព្រឹកថ្ងៃចន្ទនេះ ក្រុមអ្នកតវ៉ាបានប្រមូលផ្តុំគ្នានៅខាងក្រៅតុលាការ ដោយចងខ្សែបូពណ៌លឿងទៅនឹងរនាំងដែក កាន់បដា និងស្រែកថា «ដោះលែងលោក Julian Assange»។ នៅក្នុងការអង្វរទៅកាន់ប្រធានាធិបតីសហរដ្ឋអាមេរិក លោក Joe Biden ទង់ជាតិសរសេរថា «#Let him go Joe» (ដោះលែងគាត់ទៅលោក Joe)៕