មេដឹកនាំគណបក្សប្រឆាំងរបស់អ៊ីស្រាអែល លោក Yair Lapid នៅថ្ងៃចន្ទ (ទី២០ ឧសភា) នេះ បានថ្កោលទោសថា ជា «គ្រោះមហន្តរាយ» បន្ទាប់ពីមានសេចក្តីប្រកាសពីរដ្ឋអាជ្ញារបស់តុលាការឧក្រិដ្ឋកម្មអន្តរជាតិ (ICC) ដែលស្នើសុំដីកាចាប់ខ្លួន ប្រឆាំងនឹងនាយករដ្ឋមន្ត្រី និងរដ្ឋមន្ត្រីការពារជាតិអ៊ីស្រាអែល។

អំឡុងពេលថ្លែងទៅកាន់ក្រុមសមាជិកសភារបស់លោក លោក Lapid បានសម្តែងក្តីសង្ឃឹមថា សភាសហរដ្ឋអាមេរិក នឹងកោះប្រជុំ និងថ្កោលទោសវិធានការរបស់ ICC។

គួរបញ្ជាក់ថា ការិយាល័យរបស់រដ្ឋអាជ្ញាលោក Karim Khan របស់ ICC បានលើកឡើងថា ខ្លួនបានសង្ស័យថា នាយករដ្ឋមន្ត្រីអ៊ីស្រាអែល Benjamin Netanyahu រដ្ឋមន្ត្រីការពារជាតិ Yoav Gallant ក៏ដូចជាមេដឹកនាំក្រុមហាម៉ាស លោក Yahya Sinwar លោក Mohammed Al-Masri និងលោក Ismail Haniyeh ត្រូវទទួលខុសត្រូវ ចំពោះការចោទប្រកាន់ពីការប្រព្រឹត្តិឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលបានកើតមានទាំងនៅក្នុងប្រទេសអ៊ីស្រាអែល ឬតំបន់ហ្កាហ្សាស្ទ្រីប។

អ៊ីស្រាអែលបានបដិសេធមិនបានប្រព្រឹត្តឧក្រិដ្ឋកម្មសង្រ្គាម ក្នុងសង្រ្គាម នៅតំបន់ហ្កាហ្សានោះឡើយ ពោលគឺជាសង្គ្រាមបង្កឡើងដោយការវាយប្រហារ ដែលដឹកនាំដោយក្រុមហាម៉ាសលើអ៊ីស្រាអែល កាលពីថ្ងៃទី៧ ខែតុលា៕