បណ្ដាមេដឹកនាំពិភពលោក បានចូលរួមរំលែកមរណទុក្ខចំពោះដំណឹងដែលថាប្រធានាធិបតីអ៊ីរ៉ង់ លោក អ៊ីប្រាហ៊ីម រ៉េស៊ី (Ebrahim Raisi) ដែលត្រូវបានគេមើលឃើញថាជាអ្នកស្នងតំណែងដ៏មានសក្តានុពលរបស់មេដឹកនាំកំពូល លោក អាយ៉ាតូឡា អាលី ខាមីណេ (Ayatollah Ali Khamenei) បានស្លាប់នៅក្នុងការធ្លាក់ឧទ្ធម្ភាគចក្រនៅតំបន់ភ្នំនៅជិតព្រំដែនប្រទេសអាស៊ែរបៃហ្សង់ រួមជាមួយរដ្ឋមន្ត្រីការបរទេស និងអ្នករួមដំណើរ ព្រមទាំងបុគ្គលិក ៦ នាក់ផ្សេងទៀតបានស្លាប់ទាំងអស់។

ព្រះមហាក្សត្រនៃអារ៉ាប៊ីសាអ៊ូឌីត បានចូលរួមរំលែកទុក្ខដល់ប្រមុខរដ្ឋស្តីទីនៃអាជ្ញាធរប្រតិបត្តិរបស់អ៊ីរ៉ង់ ចំពោះមរណភាពរបស់លោកប្រធានាធិបតីអ៊ីរ៉ង់ និងដៃគូរបស់លោក។ សហរដ្ឋអាមេរិក បានសម្តែងនូវ «ការរំលែកទុក្ខជាផ្លូវការ» ចំពោះការស្លាប់របស់លោក រ៉េស៊ី និងមន្ត្រីដទៃទៀតនៅក្នុងការធ្លាក់ឧទ្ធម្ភាគចក្រ។

ប្រធានក្រុមប្រឹក្សាអឺរ៉ុប បានបង្ហោះលើបណ្ដាញសង្គម X ថា៖ «សហភាពអឺរ៉ុប សូមចូលរួមរំលែកទុក្ខយ៉ាងស្មោះស្ម័គ្រចំពោះមរណភាពរបស់លោកប្រធានាធិបតី រ៉េស៊ី និងសមាជិកដទៃទៀតនៃគណៈប្រតិភូ ព្រមទាំងអ្នកដែលបានស្លាប់ទាំងអស់ក្នុងឧបទ្ទវហេតុឧទ្ធម្ភាគចក្រនេះ»។

ក្រសួងការបរទេសចិន និយាយថា លោកប្រធានាធិបតី ស៊ី ជីនពីង (Xi Jinping) បានផ្ញើសាររំលែកទុក្ខដោយផ្ទាល់ទៅកាន់អនុប្រធានាធិបតីទីមួយរបស់អ៊ីរ៉ង់។ ប្រធានាធិបតីរុស្ស៊ី លោក វ្ល៉ាឌីមៀ ពូទីន (VLADIMIR PUTIN) និយាយថា មរណភាពរបស់លោក រ៉េស៊ី គឺជារឿងដ៏សោកសៅបំផុត។

បណ្ដាមេដឹកនាំនៃប្រទេស និងក្រុមផ្សេងៗទៀតជាច្រើនរួមមាន អាហ្វហ្គានីស្ថាន ប្រធានអាជ្ញាធរប៉ាឡេស្ទីន ប៉ាគីស្ថាន ឥណ្ឌា អ៊ីរ៉ាក់ ក្រុមហ៊ូទី របស់យេម៉ែន ក្រុមហាម៉ាស ក្រុមជីហាដ មេដឹកនាំអារ៉ាប់ កូរ៉េខាងជើង ជប៉ុន និងប្រទេសជាច្រើនទៀត ចូលរួមរំលែកទុក្ខយ៉ាងស្មោះអស់ពីចិត្តចំពោះរដ្ឋាភិបាល និងប្រជាជននៃសាធារណរដ្ឋអ៊ីស្លាមអ៊ីរ៉ង់៕