​បាល់ទាត់៖ ​បន្ទាប់ពី​ការមកដល់​របស់​ខ្សែបម្រើស្លាប Leon Bailey ពី Bayer Leverkusen ម្សិលមិញ Aston Villa ក៏បាន​ប្រកាស​ពី​ការសំរេច​ក្នុង​ការនាំយក​ខ្សែប្រយុទ្ធ​អង់គ្លេស Danny Ings ពី Southampton ក្នុងតម្លៃ ២៥លាន​ផោន​។

​​កីឡាករ​វ័យ ២៩ឆ្នាំ​រូបនេះ​បាន​ក្លាយជា​កីឡា​ករទី៤ ដែល​មកកាន់ Aston Villa ត្រៀម​រដូវ​កាល​ថ្មី​ខាងមុខនេះ​។​ ​កន្លងមក Danny Ings ធ្លាប់បាន​បដិសេធ​សំណើ​កិច្ចសន្យា​ថ្មី​ជាមួយ Southampton ស្របពេល​កិច្ចសន្យា​ចាស់​នៅសល់តែ ១ឆ្នាំ​ទៀត​ប៉ុណ្ណោះ​។ ​Danny Ings បាន​បដិសេធ​សំណើ​ដ៏​ធំ​មួយ​ពី Southampton ដែល​ហ៊ាន​ឱ្យ​កិច្ចសន្យា​កីឡាករ​វ័យ ២៨ឆ្នាំ​រូបនេះ ៤ឆ្នាំ​បន្ថែម និង​ផ្តល់ប្រាក់​ឈ្នួល​ថ្លៃ​បំផុត​មិន​ធ្លាប់មាន​នៅក្នុង​ក្លិប​ផងដែរ​។ ​អតីត​កីឡាករ Burnley រូបនេះ​ធ្លាប់​លេង​ឱ្យ​ Liverpool ផងដែរ​ តែ​សោកស្តាយ​នៅពេល​នោះគេ​មិនអាច​បញ្ចេញ​សមត្ថភាព​ឱ្យអស់​បាន ​ដោយសារ​របួស​ជង្គង់​ធ្ងន់​ពីរលើក​។ ​តែ​តាំងពី​មកដល់ Southampton កាលពី​ឆ្នាំ​២០១៩ មក​ដល់​ពេល​នេះ Danny Ings ស៊ុត​បញ្ចូល​ទី​បាន ៣៤​គ្រាប់​ក្នុងការ​បង្ហាញខ្លួន ៦៧​លើក​ដែល​ក្នុង​នោះ​មាន​គ្រាប់​បាល់​នៅ English Premier League ៥០​គ្រាប់​។

​​ទំរង់​លេង​អស្ចារ្យ​របស់ Danny Ings រដូវ​កាល​មុន​ក៏បាន​ធ្វើឱ្យ​លោក Gareth Southgate កោះ​ហៅ​ចូល​ក្រុម​ជំរើសជាតិ​អង់គ្លេស​ផងដែរ ​ក្នុង​ការប្រកួត​អន្តរជាតិ​កាលពី​ខែ​កញ្ញា និង​តុលា​ឆ្នាំមុន តែ​សោក​ស្តាយ​ដែល​មិន​មាន​ឈ្មោះ​នៅ Euro ២០២០ នេះ​ដោយសារ​របួស​មិនទាន់​ជា ១០០% បូករួម​ទាំង​តេស្ត​វិជ្ជមាន Covid-19 មុន​ចប់​រដូវ​កាល English Premier League​។ Manchester City ជា​ក្លិប​ធំ​មួយ​ដែលមាន​ទំនាក់ទំនង​ចង់បាន​កីឡាករ​វ័យ ២៨ឆ្នាំ​រូបនេះ ខណៈ​កន្លងមក Manchester United និង Tottenham Hotspur ក៏​ធ្លាប់​ទាក់ទង​ផងដែរ​៕

​អត្ថបទ​៖​នាង សុភា​វុ​ធ