ដើម្បីឆ្លើយតបតម្រូវការការងារទីផ្សារការងារ ក៏ដូចជាបំពេញតម្រូវការអ្នកស្វែងរកការងារធ្វើ មជ្ឈមណ្ឌលការងារចល័តរបស់ទីភ្នាក់ងារជាតិមុខរបរ និងការងារ (NEA) នៅតែបន្តចុះផ្សព្វផ្សាយឱកាសការងារនៅតាមសាកលវិទ្យាល័យ និងគ្រឹះស្ថានសិក្សានានា ដើម្បីផ្តល់ព័ត៌មានអំពីទីផ្សារការងារឲ្យកាន់តែខិតជិតដល់យុវជន និងអ្នកស្វែងរកការងារ។
បើតាមកាលវិភាគរបស់មជ្ឈមណ្ឌលការងារចល័ត NEA នៅថ្ងៃទី២១ ខែឧសភា ឆ្នាំ២០២៤នេះ នឹងចុះផ្សព្វផ្សាយឱកាសការងារនៅសាកលវិទ្យាល័យ និងគ្រឹះស្ថានសិក្សាចំនួន ៥កន្លែង រួមមាន៖ សាកលវិទ្យាល័យភូមិន្ទភ្នំពេញ (RUPP) , សាកលវិទ្យាល័យអាស៊ី អឺរ៉ុប (AEU) , វិទ្យាស្ថានជាតិសង្គមកិច្ច (NISA) , សាកលវិទ្យាល័យធនធានមនុស្ស (HRU) និងសាកលវិទ្យាល័យកម្ពុជា (UC)។
ជួបសម្ភាសន៍ជាមួយនិស្សិតនៅសាកលវិទ្យាល័យភូមិន្ទភ្នំពេញ កញ្ញា គ្រី ពីណា និងលោក គង់ លីហួរ និស្សិតឆ្នាំទី២ ជំនាញផ្នែកគ្រប់គ្រងពាណិជ្ជកម្មអន្តរជាតិ ហៅកាត់ IBM បានឲ្យដឹងថា សព្វថ្ងៃនេះបានមើលឃើញថា អត្រាការងារពិតជាមានច្រើនណាស់ និងមិនមែនតែមួយផ្នែកនោះទេ ប៉ុន្តែអ្វីដែលសំខាន់ចំពោះមុខ គឺការត្រៀមខ្លួនដើម្បីឆ្លើយតបទីផ្សារការងារដែលកំពុងមានតម្រូវការ។
យុវជនទាំង២រូបនេះ បានលើកឡើងស្រដៀងគ្នាទៀតថា ការផ្សព្វផ្សាយអំពីព័ត៌មានទីផ្សារការងារសព្វថ្ងៃនេះទៀតសោត ក៏មានភាពទូលំទូលាយច្រើនជាងមុនផងដែរ មិនថាតាមរយៈការផ្សព្វផ្សាយដោយផ្ទាល់ និងតាមប្រព័ន្ធអ៊ិនធើណេតជាដើម ដោយឃើញថា ពិតជាផ្តល់ឱកាសកាន់តែជាច្រើនក្នុងការស្វែងយល់ពីតម្រូវការការងារទាំងពេលបច្ចុប្បន្ន និងទៅអនាគត។
ក្នុងគោលបំណងឆ្លើយតបតម្រូវការការងារ ក៏ដូចជាផ្តល់នូវដំណោះស្រាយបញ្ហាទីផ្សារការងារ រាជរដ្ឋាភិបាលកម្ពុជា បានបង្កើតទីភ្នាក់ងារជាតិមុខរបរនិងការងារ (NEA) ដើម្បីផ្តល់សេវាការងារ និងព័ត៌មានទីផ្សារការងារជាសាធារណៈនៅមួយកន្លែង និងងាយស្រួលតាមរយៈប្រព័ន្ធផ្សព្វផ្សាយនានា ដូចជា តាមរយៈគេហទំព័រ, ហ្វេសប៊ុក , តេឡេក្រាម និងនៅតាមមជ្ឈមណ្ឌលការងារនៅរាជធានី-ខេត្ត និងរថយន្តចល័ត។ បន្ថែមពីនេះទៀត NEA ក៏បានសហការជាមួយ ស.ស.យ.ក. វិស័យការងារ ដែលគាំទ្រដោយកម្មវិធីអភិវឌ្ឍជំនាញ (SDP) បានចុះរៀបចំសិក្ខាសាលាស្តីពី "ការត្រៀមលក្ខណៈសម្បត្តិក្នុងការស្វែងរកការងារ" នៅតាមបណ្តាខេត្តជាប់ព្រំដែនចំនួន៣ផ្សេងទៀត មានដូចជា ខេត្តឧត្តមានជ័យ, ខេត្តព្រះវិហារ និងខេត្តមណ្ឌលគីរី ជូនដល់សិក្ខាកាមដែលត្រៀមបញ្ចប់វគ្គបណ្តុះបណ្តលរយៈពេល ៤ខែ ក្នុងកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
