បណ្តាវត្តមួយចំនួននៅក្នុងរាជធានីភ្នំពេញ នៅថ្ងៃទី២១ខែឧសភានេះ កំពុងមមាញឹក​រៀប​ចំ​តុប​តែង​លម្អ ត្រៀមប្រារព្ធពិធីបុណ្យវិសាខបូជាដែលនឹងចូលមកដល់នៅថ្ងៃស្អែក។ ជាក់ស្តែងដូចជា វត្តមុនីសុវណ្ណ និងវត្តនិគ្រោធវ័នគល់ទទឹងជាដើម។

បើតាមសង្ឃដីកាព្រះតេជគុណ យ៉ាំ ស៊ូគិ សមាជិកគណៈកម្មការកណ្តាលរៀបចំពិធី​បុណ្យ​មហា​វិសាខ​បូជា និងខួប២០ឆ្នាំ ព្រះត្រៃរតនចេតិយ ស្ថិតនៅវត្តនិគ្រោធវ័នគល់ទទឹង រាជធានីភ្នំពេញ បានប្រាប់​​BTVឱ្យដឹងថា នៅឆ្នាំនេះ វត្តនិគ្រោធវ័នគល់ទទឹងបានរៀបចំពិធីបុណ្យមហាវិសាខបូជា ឬ​ហៅថាវិសាខបូជា អធិកអធមជាងឆ្នាំមុន ដោយគិតព្រឹកថ្ងៃទី២១ខែឧសភានេះ ការរៀប​ចំ​សម្រេច​បាន​លើសពី៥០ភាគរយ ហើយការរៀបចំនេះនឹងរួចរាល់នៅល្ងាចនេះ ដើម្បីត្រៀម​ទទួល​ពុទ្ធ​បរិស័ទ​អញ្ជើញមកចូលរួមក្នុងពិធីបុណ្យវិសាខបូជា និងខួប២០ឆ្នាំព្រះត្រៃរតនចេតិយ ដែល​វត្ត​គល់​ទទឹងប្រារព្ធធ្វើឡើងជាមួយគ្នានៅក្នុងឆ្នាំនេះ។ ព្រះតេជគុណមានសង្ឃដីកាបន្តថា ការ​ប្រារព្ធ​ពិធី​បុណ្យ​វិសាខ​បូជា​នៅ​ថ្ងៃស្អែក នឹងមានកម្មវិធីសាសនាជាច្រើនរួមមានដូចជា៖ នមស្ការ​សមាទាន​សីល រាប់បាតព្រះសង្ឃ និងស្តាប់ព្រះធម៌ទេសនាជាដើម។

ពិធីបុណ្យវិសាខបូជា‌តែងតែប្រារព្ធឡើងជារៀងរាល់ឆ្នាំ នៅថ្ងៃ១៥កើត ខែវិសាខ ដើម្បី​រំលឹក​ដល់​ព្រឹត្តិការណ៍​ធំៗចំនួនបី នាសម័យកាលរបស់ព្រះសម្មាសម្ពុទ្ធសមណគោតម ដែលក្នុង​នោះ​រួម​មាន​៖ ទី១.ជាថ្ងៃព្រះអង្គទ្រង់ប្រសូត ទី២.ជាថ្ងៃព្រះអង្គទ្រង់ត្រាស់ដឹងជាព្រះសម្មាសម្ពុទ្ធ ក្រោម​ម្លប់​ពោធិ៍​ព្រឹក្ស និងទី៣. ជាថ្ងៃដែលព្រះអង្គទ្រង់រំលត់សង្ខារ ចូលកាន់ព្រះបរិនិព្វាន។

បុណ្យ​វិសាខបូជា គឺជាថ្ងៃបុណ្យដ៏សំខាន់មួយ ក្នុងចំណោមពិធីបុណ្យសំខាន់ៗ នៅក្នុងព្រះ​ពុទ្ធ​សាសនា ក្នុងនោះមានដូចជា បុណ្យមាឃបូជា អាសាឍបូជា និងអស្សុជបូជាជាដើម ដែលពិធី​បុណ្យ​ទាំង​អស់នេះ ថ្នាក់ដឹកនាំរាជរដ្ឋាភិបាល អាជ្ញាធររាជធានី-ខេត្ត រួមទាំងពុទ្ធបរិស័ទ បានធ្វើ​នៅ​តាម​វត្តអារាម នៅទូទាំងប្រទេស ដោយមានការរៀបចំធ្វើពិធីតាមបែបព្រះពុទ្ធសាស ហើយ​រាជ​រដ្ឋាភិបាល ក៏បានយកថ្ងៃនេះ ជាថ្ងៃឈប់សម្រាកផងដែរ៕ អត្ថបទ៖ទូច សោភ័ណ