បាល់ទាត់៖ ​បន្ទាប់ពី​សំណើ​ចាស់ ៨៥លាន​ផោនបូក​បន្ថែម​ទាំង​ខ្សែការពារ​អេ​ស្ប៉ា​ញ Marcos Alonso ទៅកាន់ Inter Milan ទិញ​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku ត្រូវបាន​បដិសេធ​នោះ Chelsea គ្រោង​ដាក់សំណើ​ថ្មី​ដែលមាន​តម្លៃ​បំបែក​កំណត់ត្រា​នៅ English Premier League​។

​​អ្នកសារព័ត៌មាន​កីឡា​ដែល​អាច​ជឿ​ទុកចិត្តបាន Fabrizio Romano បានឱ្យដឹងថា​ សំណើ​ថ្មី​របស់ Chelsea នោះ​គឺ​តម្លៃ​ចន្លោះ​ពី ១០២ ទៅ ១១១លាន​ផោន ដែល​ធ្វើឱ្យ Romelu Lukaku ក្លាយជា​កីឡាករ​ដែល​ផ្ទេរ​មកកាន់ English Premier League ក្នុងតម្លៃ​ខ្ពស់បំផុតបំបែក​កំណត់ត្រា​របស់ Paul Pogba ៨៦លាន​ផោន និង​គ្រោង​បំបែក​កំណត់ត្រា Jack Grealish ដែល​គ្រោង​មកកាន់ Manchester City ក្នុងតម្លៃ ១០០លាន​ផោន​ទៀតផង​។​ កីឡាករ​វ័យ ២៨ឆ្នាំគឺជា​គោលដៅ​របស់ Chelsea ដែល​កំពុង​ស្វែងរក​ខ្សែប្រយុទ្ធ​ជួរមុខ​ម្នាក់​ បន្ទាប់ពី​ការចង់បាន​ខ្សែប្រយុទ្ធ Dortmund, Erling Haaland មិនអាច​ទៅរួច​។​

Romelu Lukaku ធ្លាប់ជា​អតីត​កីឡាករ​របស់ Chelsea ចន្លោះ​ឆ្នាំ២០១១ ដល់ ២០១៤ មុនពេល​ផ្ទេរ​ទៅកាន់ Everton ក្រោយ​ចំណាយពេល​ ១រដូវ​កាល​ក្នុង​លក្ខខណ្ឌ​ខ្ចី​នៅ Goodison Park​។​ ​Lukaku ស៊ុត​បញ្ចូល​ទី​បាន ៤២គ្រាប់​ក្នុងការ​បង្ហាញខ្លួន ៩៦ប្រកួត​ឱ្យ Manchester United តែ​ក៏បាន​ចាក​ចេញទៅ Inter Milan កាលពី​ឆ្នាំ២០១៩ ក្នុងតម្លៃ​កំណត់ត្រា​ក្លិប ៧៤លាន​ផោន​ជាមួយនឹង​កិច្ចសន្យា ៥ឆ្នាំ​។ ​Lukaku គឺជា​សមាជិក​សំខាន់​របស់ Inter Milan ដែល​ឈ្នះ​ជើងឯក Serie A រដូវ​កាល​មុន​ក្រោយ​រកបាន ២៤គ្រាប់ និង​បញ្ជូន ១១បាល់​៕

​អត្ថបទ​៖​នាង សុភា​វុ​ធ