លោកប្រធានាធិបតី វ្ល៉ូឌីមី ហ៊្សេឡិនស្គី (Volodymyr Zelenskiy) បានប្រាប់សារព័ត៌មានរ៉យទ័រ ក្នុងបទសម្ភាសន៍ផ្តាច់មុខមួយក្នុងទីក្រុងគីវ កាលពីថ្ងៃចន្ទ (២០ ឧសភា) ថា សម្ព័ន្ធមិត្តលោកខាងលិចចំណាយពេលយូរខ្លាំងពេកក្នុងការសម្រេចចិត្តសំខាន់ៗលើការគាំទ្រផ្នែកយោធាសម្រាប់អ៊ុយក្រែន។

លោកនិយាយថា លោកកំពុងជំរុញបណ្ដាដៃគូឱ្យចូលរួមដោយផ្ទាល់នៅក្នុងសង្រ្គាមតាមរយៈការជួយស្ទាក់ចាប់មីស៊ីលរុស្ស៊ី ពីលើអ៊ុយក្រែន និងអនុញ្ញាតឱ្យទីក្រុងគីវ ប្រើប្រាស់អាវុធរបស់លោកខាងលិចប្រឆាំងនឹងឧបករណ៍យោធារបស់សត្រូវដែលប្រមូលផ្តុំនៅជិតព្រំដែន។

ការអំពាវនាវឱ្យពន្លឿនជំនួយ និងការជំរុញឱ្យមានការចូលរួម «ដោយផ្ទាល់» នៅក្នុងជម្លោះនេះ ឆ្លុះបញ្ចាំងពីការកើនឡើងនៃសម្ពាធ ដែលកងកម្លាំងរបស់លោក ហ៊្សេឡិនស្គី កំពុងជួបប្រទះនៅតាមបណ្តោយខ្សែរប្រយុទ្ធជួរមុខជាង ១.០០០ គីឡូម៉ែត្រនៅភាគឦសាន ខាងកើត និងភាគខាងត្បូងនៃប្រទេស។

ប្រធានាធិបតីអ៊ុយក្រែនរូបនេះបន្ថែមថា ស្ថានភាពនៅសមរភូមិនៅពេលនេះគឺជា «ពេលវេលាលំបាកបំផុតមួយ» ចាប់តាំងពីការចាប់ផ្តើមនៃការវាយលុកទ្រង់ទ្រាយធំរបស់រុស្ស៊ី ក្នុងខែកុម្ភៈ ឆ្នាំ២០២២ មក៕