ការវិភាគរបស់សារព័ត៌មាន BBC បានរកឃើញថា ចំនួនជាង ៣ ភាគ៤ នៃទឹកដីតំបន់ហ្កាហ្សា ត្រូវបានគេកំណត់ថា ជាតំបន់ជម្លៀសដោយយោធាអ៊ីស្រាអែល ចាប់តាំងពីសង្រ្គាមប្រឆាំងនឹងក្រុមហាម៉ាស បានចាប់ផ្តើម នៅក្នុងខែតុលា។

កងកម្លាំងការពារអ៊ីស្រាអែល (IDF) បានចេញបញ្ជាពីការជម្លៀសទៅដល់ប្រជាជនហ្កាហ្សា ចាប់តាំងពី   អ៊ីស្រាអែល បានចាប់ផ្តើមយុទ្ធនាការយោធាកាលពីថ្ងៃទី៧ ខែតុលា ដើម្បីជាការឆ្លើយតបទៅនឹងការវាយប្រហារឆ្លងព្រំដែននៅថ្ងៃនោះដោយក្រុមហាម៉ាស ដែលក្នុងនោះមនុស្សប្រហែល ១.២០០នាក់ បានស្លាប់ និង ២៥២នាក់ ត្រូវបានចាប់ធ្វើជាចំណាប់ថ្នូរ។ មកទល់ពេលនេះ ការឆ្លើយតបរបស់អ៊ីស្រាអែល បានសម្លាប់មនុស្សជាង ៣៥.000នាក់ នៅក្នុងតំបន់ហ្កាហ្សា នេះបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស។

ការវិភាគរបស់សារព័ត៌មាន BBC បង្ហាញពីតំបន់ប្រមូលផ្តុំដែលត្រូវបានកំណត់ថា ជាតំបន់ជម្លៀសមានដល់ទៅ ២៨១គីឡូម៉ែត្រក្រឡា (១០៨ ម៉ាយក្រឡា)។ នោះគឺស្មើនឹង ៧៧ភាគរយនៃទឹកដីតំបន់ហ្កា    ហ្សា។

កងកម្លាំងការពារអ៊ីស្រាអែល (IDF) បានប្រាប់សារព័ត៌មាន BBCថា ការណែនាំអំពីការជម្លៀសខ្លួន កំពុងការពារជនស៊ីវិល ដោយដឹកនាំពួកគេទៅកាន់តំបន់ដែលមានសុវត្ថិភាពជាងនេះ។

អង្គការសហប្រជាជាតិ និងទីភ្នាក់ងារជំនួយផ្សេងទៀត ទទូចថា មិនមានតំបន់សុវត្ថិភាពសម្រាប់ជនស៊ីវិលប្រមាណពីរលាននាក់ នៅតំបន់ហ្កាហ្សានោះទេ។ ពួកគេ ក៏បានចោទសួរពីភាពសមស្របនៃ «តំបន់មនុស្សធម៌"»ដែលកំណត់ដោយកងកម្លាំងការពារអ៊ីស្រាអែល នៅក្នុងទឹកដីនេះ។