ប្រទេសប៉ូឡូញបានចាប់ខ្លួនមនុស្ស ៩នាក់ ពាក់ព័ន្ធនឹងអំពើវិឆ្ឆេតកម្ម ដែលបានប្រព្រឹត្តនៅក្នុងប្រទេសនេះ តាមបញ្ជារបស់សេវាកម្មរុស្ស៊ី។ នេះបើតាមការប្រាប់ឲ្យដឹងពីនាយករដ្ឋមន្ត្រី លោក Donald Tusk កាលពីយប់ថ្ងៃចន្ទ (ទី២០ ខែឧសភា)។

ទីក្រុងវ៉ាសូវី និយាយថា ទីតាំងរបស់ខ្លួនជាមជ្ឈមណ្ឌល សម្រាប់ការផ្គត់ផ្គង់ដល់ប្រទេសអ៊ុយក្រែន បានធ្វើឲ្យវាក្លាយជាគោលដៅសំខាន់ សម្រាប់សេវាស៊ើបការណ៍សម្ងាត់របស់រុស្ស៊ី ហើយបានចោទប្រកាន់ក្រុងមូស្គូពីការព្យាយាមធ្វើឲ្យប្រទេសរបស់ខ្លួនអស្ថិរភាព។

លោក Tusk បានប្រាប់ទូរទស្សន៍ឯកជន TVN24 ថា៖ «បច្ចុប្បន្នយើងមានជនសង្ស័យចំនួន ៩នាក់ ដែលត្រូវបានចាប់ខ្លួន និងចោទប្រកាន់ពីបទចូលរួម ក្នុងសកម្មភាពវិឆ្ឆេទកម្ម នៅក្នុងប្រទេសប៉ូឡូញ ដោយផ្ទាល់ តំណាងឲ្យសេវាកម្មរុស្ស៊ី។ នេះរួមបញ្ចូលទាំងការវាយដំ ការដុត និងប៉ុនប៉ងដុតបំផ្លាញ»។

លោក Tusk បាននិយាយថា ប្រទេសប៉ូឡូញកំពុងសហការជាមួយសម្ព័ន្ធមិត្តរបស់ខ្លួនលើបញ្ហានេះ ហើយថាផែនការនេះ ក៏ប៉ះពាល់ដល់ប្រទេសលីទុយអានី ឡាតវី និងប្រហែលជាស៊ុយអែតផងដែរ។ នៅដើមខែនេះ មេដឹកនាំរូបនេះបាននិយាយថា ប៉ូឡូញនឹងបែងចែកនូវទឹកប្រាក់ ២៥,៥៣លានដុល្លារ ដល់សេវាកម្មស៊ើបការណ៍របស់ខ្លួន ដោយសារតែមានការគំរាមកំហែងពីរុស្ស៊ី។

កាលពីខែមេសា មនុស្ស ២នាក់ត្រូវបានឃុំខ្លួន ក្នុងប្រទេសប៉ូឡូញ ពីបទសង្ស័យថា បានវាយប្រហារជំនួយការជាន់ខ្ពស់របស់សពអតីតមេដឹកនាំគណបក្សប្រឆាំងរុស្ស៊ី លោក Alexei Navalny គឺលោក Leonid Volkov ដែលកំពុងរស់នៅនិរទេសខ្លួន៕