កងកម្លាំងអ៊ីស្រាអែល បានវាយឆ្មក់ចូលទីក្រុងជេនីន (Jenin) នៅតំបន់ West Bank ដែលកាន់កាប់កាលពីថ្ងៃអង្គារក្នុងប្រតិបត្តិការដែលក្រសួងសុខាភិបាលប៉ាឡេស្ទីន បាននិយាយថា បានសម្លាប់ជនជាតិប៉ាឡេស្ទីន ៧នាក់រួមទាំងវេជ្ជបណ្ឌិតម្នាក់ និងបានបង្កឲ្យមនុស្ស ៩នាក់ផ្សេងទៀត រងរបួស។

កងទ័ព បាននិយាយថា នេះគឺជាប្រតិបត្តិការប្រឆាំងនឹងក្រុមសកម្មប្រយុទ្ធ ហើយខ្មាន់កាំភ្លើងប៉ាឡេស្ទីនជាច្រើននាក់ ត្រូវបានបាញ់សម្លាប់។ ពុំមានការរាយការណ៍ភ្លាមៗអំពីជនជាតិអ៊ីស្រាអែលណាម្នាក់ស្លាប់ ឬរងរបួសទេ។

ចំនួនអ្នកស្លាប់ឬរងរបួសរបស់ក្រសួងសុខាភិបាល ត្រូវបានដកស្រង់ដោយទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA។

ប្រធានមន្ទីរពេទ្យ Jenin Governmental Hospital បាននិយាយថា ក្នុងចំណោមជនជាតិប៉ាឡេស្ទីនដែលត្រូវបានសម្លាប់ គឺជាគ្រូពេទ្យវះកាត់ម្នាក់។ លោកប្រធានមន្ទីរពេទ្យ បាននិយាយថា គាត់ត្រូវបានគេសម្លាប់ នៅក្បែរមន្ទីរពេទ្យនេះ។

តំបន់វេសបែង គឺស្ថិតក្នុងចំណោមទឹកដីដែលអ៊ីស្រាអែលបានរឹបអូស ក្នុងសង្រ្គាមមជ្ឈិមបូព៌ាឆ្នាំ ១៩៦៧ ។ ប៉ាឡេស្ទីន ចង់ឲ្យវាក្លាយជាតំបន់ស្នូលនៃរដ្ឋប៉ាឡេស្ទីនឯករាជ្យ។ កិច្ចពិភាក្សាដែលឧបត្ថម្ភដោយសហរដ្ឋអាមេរិកស្តីពីដំណោះស្រាយរដ្ឋពីរចំពោះជម្លោះ ដែលមានអាយុកាលរាប់ទសវត្សរ៍ បានបរាជ័យ ក្នុងឆ្នាំ២០១៤។