ក្រុមអ្នកស៊ើបអង្កេតសុវត្ថិភាពរថយន្តរបស់សហរដ្ឋអាមេរិក កាលពីថ្ងៃចន្ទ (ទី២០ ខែឧសភា) បាននិយាយថា ពួកគេនឹងស៊ើបអង្កេតលើឧបទ្ទវហេតុ កាលពីខែមេសា ពាក់ព័ន្ធនឹងរថយន្តអគ្គិសនី VF 8 របស់ក្រុមហ៊ុន VinFast នៅទីក្រុង Pleasanton ក្នុងរដ្ឋ California ដែលហេតុការណ៍នោះបណ្ដាលឲ្យគ្រួសារមានសមាជិក ៤នាក់ ស្លាប់។

រដ្ឋបាលសុវត្ថិភាពចរាចរណ៍ផ្លូវហាយវេជាតិ (NHTSA) បានប្រាប់ថា ការស៊ើបអង្កេតនឹងពិនិត្យមើលស្ថានភាពនៃគ្រោះថ្នាក់ កាលពីថ្ងៃទី២៤ ខែមេសា និងការបង្កជាចំហេះ។ ពាក្យបណ្តឹងដែលប្តឹងទៅទីភ្នាក់ងារនេះ បានលើកឡើងថា ការបញ្ជាចង្កូតអាចជាបញ្ហានៅក្នុងឧបទ្ទវហេតុ ដែលបានសម្លាប់ប្តីប្រពន្ធមួយគូ រួមជាមួយនឹងកូនៗរបស់ពួកគេ ដែលមានអាយុ ១៣ឆ្នាំ និង ៩ឆ្នាំ។

នគរបាលទីក្រុង Pleasanton បាននិយាយថា អ្នកបើកបរក្នុងឧបទ្ទវហេតុរថយន្តតែមួយគ្រឿនេះ ទំនងជាមិនអាចគ្រប់គ្រងរថយន្តបាន ហើយបានទៅបុកដើមសែនដ៏ធំមួយដើម ហើយថា ល្បឿនអាចជាកត្តាដ៏ធំមួយ។

ពាក់ព័ន្ធនឹងករណីនេះ ក្រុមហ៊ុនផលិតរថយន្តវៀតណាម VinFast ដែលបានចាប់ផ្តើមលក់រថយន្ត នៅសហរដ្ឋអាមេរិក ក្នុងឆ្នាំ២០២៣ មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕