តាមរយៈសេចក្ដីថ្លែងការណ៍ ប្រធានាធិបតីស៊ីរី លោក Bashar al-Assad នៅថ្ងៃអង្គារ (ទី២១ ខែឧសភា) នេះ បានប្រាប់ថា ស្ត្រីទី១ របស់ប្រទេសស៊ីរី គឺលោកស្រី Asma al-Assad ត្រូវបានគេធ្វើរោគវិនិច្ឆ័យរកឃើញថា មានជំងឺមហារីកគ្រាប់ឈាម។

សេចក្តីថ្លែងការណ៍នោះ បានឲ្យដឹងថា លោកស្រី Asma វ័យ ៤៨ឆ្នាំ នឹងឆ្លងកាត់វិធីព្យាបាលពិសេសមួយដែលតម្រូវឲ្យលោសក្រីនៅដាច់ដោយឡែកពីអ្នកដទៃ ហើយថា លោកស្រីនឹងមិនមានការចូលរួមកម្មវិធីជាសាធារណៈនានានោះឡើយ។ កាលពីខែសីហា ឆ្នាំ២០១៩ លោកស្រី Asma បានប្រាប់ថា លោកស្រីបានជាសះស្បើយទាំងស្រុងពីជំងឺមហារីកសុដន់ ដែលលោកស្រីបាននិយាយថា ត្រូវបានរកឃើញលឿន ពោលគឺពេលជំងឺនៅស្រាលនៅឡើយ។

គួរបញ្ជាក់ថា ចាប់តាំងពីប្រទេសស៊ីរីធ្លាក់ចូលទៅក្នុងសង្រ្គាម ក្នុងឆ្នាំ២០១១ អតីតប្រធានធនាគារវិនិយោគដែលមានដើមកំណើតអង់គ្លេសរូបនេះ បានដើរតួនាទីសាធារណៈ ក្នុងការដឹកនាំកិច្ចខិតខំប្រឹងប្រែងសប្បុរសធម៌ និងជួបជាមួយគ្រួសារទាហានពលីជីវិត ប៉ុន្តែក៏ត្រូវបានក្រុមប្រឆាំងស្អប់ខ្ពើមផងដែរ។

លោកស្រីគ្រប់គ្រងស្ថាប័ន Syria Trust for Development ជាអង្គការក្រៅរដ្ឋាភិបាលដ៏ធំមួយដែលដើរតួនាទីជាអង្គការម្លប់ឆ័ត្រ សម្រាប់ប្រតិបត្តិការជំនួយ និងការអភិវឌ្ឍជាច្រើន នៅក្នុងប្រទេសស៊ីរី៕