វិមានក្រឹមឡាំង នៅថ្ងៃអង្គារ (ទី២១ ខែឧសភា) នេះ បាននិយាយថា វាគឺជារឿងចម្លែកខ្លាំងណាស់ ដែលសហរដ្ឋអាមេរិកទំនងជាត្រៀមជាស្រេច ដើម្បីប្រើប្រាស់ទណ្ឌកម្មប្រឆាំងនឹងតុលាការឧក្រិដ្ឋកម្មអន្តរជាតិ (ICC) ដែលរដ្ឋអាជ្ញារបស់ស្ថាប័ននេះ បានស្នើសុំដីកាចាប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu ប្រមុខការពារជាតិរបស់លោក និងមេដឹកនាំក្រុមហាម៉ាសចំនួន ៣នាក់ ពាក់ព័ន្ធនឹងឧក្រិដ្ឋកម្មសង្គ្រាម។

សូមបញ្ជាក់ថា តាមរយៈសេចក្តីថ្លែងការណ៍មួយដែលបានចេញ បន្ទាប់ពីមានសង្រ្គាមជាង ៧ខែ នៅតំបន់ហ្កាហ្សា រដ្ឋអាជ្ញារបស់ ICC លោក Karim Khan បាននិយាយថា លោកមានហេតុផលសមរម្យគ្រប់គ្រាន់ ក្នុងការជឿថា បុគ្គលទាំង ៥នាក់នោះ «ត្រូវទទួលខុសត្រូវចំពោះបទល្មើសព្រហ្មទណ្ឌ» ដោយសារការប្រព្រឹត្តិឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ។

ប្រធានាធិបតីអាមេរិកលោក Joe Biden បានហៅជំហានផ្លូវច្បាប់នេះថា «ជារឿងហួសហេតុគួរឲ្យចង់សើច» ខណៈដែលរដ្ឋមន្ត្រីការបរទេសលោក Antony Blinken បាននិយាយថា វាអាចប៉ះពាល់ដល់ការចរចាឲ្យមានកិច្ចព្រមព្រៀងដោះលែងចំណាប់ថ្នូរ និងបទឈប់បាញ់។

ហើយបន្ទាប់មកសមាជិកសភាអាមេរិកមួយចំនួន បានអំពាវនាវឲ្យសហរដ្ឋអាមេរិកដាក់ទណ្ឌកម្មលើតុលាការនេះ។ កាលពីឆ្នាំ២០២០ សហរដ្ឋអាមេរិកបានដាក់ទណ្ឌកម្ម ចំពោះរដ្ឋអាជ្ញារបស់ ICC។

ពាក់ព័ន្ធនឹងគោលបំណងដាក់ទណ្ឌកម្មនេះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «ជាទូទៅ ស្ថានភាព គឺលើសពីចម្លែកទៅទៀត ទាក់ទងនឹងអាកប្បកិរិយា និងឆន្ទៈរបស់សហរដ្ឋអាមេរិក ក្នុងការប្រើប្រាស់វិធីសាស្រ្តដាក់ទណ្ឌកម្ម សូម្បីតែប្រឆាំងនឹង ICC»។

កាលពីខែមីនាឆ្នាំមុន ICC បានចេញដីកាចាប់ខ្លួនប្រធានាធិបតីរុស្ស៊ី លោក Vladimir Putin ពីបទប្រព្រឹត្តឧក្រិដ្ឋកម្មសង្រ្គាម។ រុស្ស៊ីនិយាយថា ដីកាប្រឆាំងលោក Putin គឺជាការប៉ុនប៉ងឥតន័យរបស់លោកខាងលិច ដើម្បីបំផ្លាញកេរ្តិ៍ឈ្មោះរបស់រុស្ស៊ី និងបដិសេធការប្រព្រឹត្តិឧក្រិដ្ឋកម្មសង្រ្គាម នៅអ៊ុយក្រែន៕