រដ្ឋាភិបាលបែលហ្ស៊ិក នៅថ្ងៃអង្គារ (ទី២១ ខែឧសភា) នេះ បានឲ្យដឹងថា បណ្តាប្រទេសជាសមាជិករបស់សហភាពអឺរ៉ុប (EU) បានអនុម័តជាផ្លូវការនូវផែនការមួយ ដើម្បីប្រើប្រាស់ប្រាក់ចំណេញពីទ្រព្យសម្បត្តិរបស់ធនាគារកណ្តាលរុស្ស៊ីដែលត្រូវបានបង្កកនៅអឺរ៉ុប សម្រាប់ការការពារប្រទេសអ៊ុយក្រែន។

អត្ថបទនេះត្រឹមតែត្រូវការការអនុម័តដោយស្វ័យប្រវត្តិពីបណ្ដារដ្ឋមន្ត្រីប៉ុណ្ណោះ បន្ទាប់ពីឯកអគ្គរដ្ឋទូត EU បានឈានដល់កិច្ចព្រមព្រៀង កាលពីដើមខែឧសភានេះ។ នៅក្រោមកិច្ចព្រមព្រៀងនេះ ប្រាក់ចំណូល ៩០ភាគរយ នឹងចូលទៅក្នុងមូលនិធិដែលគ្រប់គ្រងដោយ EU សម្រាប់ផ្ដល់ជំនួយយោធាដល់អ៊ុយក្រែន ដោយ ១០ភាគរយផ្សេងទៀត នឹងគាំទ្រដល់ទីក្រុងគីវ តាមមធ្យោបាយផ្សេងទៀត។

អ្នកការទូត EU បានឲ្យដឹងថា សហភាពអឺរ៉ុបរំពឹងថា ទ្រព្យសម្បត្តិនេះ នឹងផ្តល់ផលចំណេញប្រហែល ១៥-២០ពាន់លានអឺរ៉ូ (១៦,៣០-២១,៧០ពាន់លានដុល្លារ) នៅឆ្នាំ២០២៧។ អ៊ុយក្រែនត្រូវបានគេរំពឹងថា នឹងទទួលបានផលចំណេញពីទ្រព្យសម្បត្តិបង្កកនេះលើកដំបូង នៅក្នុងខែកក្កដា។

គួរបញ្ជាក់ថា ក្រុមប្រទេសមានឧស្សាហកម្មលូតលាស់ទាំង៧ (G7) បានផ្អឹបទុកទ្រព្យសកម្មហិរញ្ញវត្ថុរបស់រុស្ស៊ី ដែលមានតម្លៃប្រហែល ៣០០ពាន់លានដុល្លារភ្លាមៗ បន្ទាប់ពីមានការលុកលុយរបស់ទីក្រុងមូស្គូលើអ៊ុយក្រែន ក្នុងឆ្នាំ២០២២។ ចាប់តាំងពីពេលនោះមក EU និងប្រទេស G7 ផ្សេងទៀត បានពិភាក្សាគ្នាអំពីរបៀប និងថា តើត្រូវប្រើប្រាស់មូលនិធិ ដើម្បីជួយអ៊ុយក្រែនយ៉ាងដូចម្ដេច។

ជាមួយគ្នានេះ រដ្ឋមន្ត្រីក្រសួងរតនាគារអាមេរិក លោកស្រី Janet Yellen កំពុងជំរុញប្រទេសសមាជិក G7 នៅសប្តាហ៍នេះ ឲ្យយល់ព្រមលើផែនការប្រើប្រាស់ប្រាក់ចំណេញជាប្រាតិភោគ ដែលគាំទ្រឲ្យមានប្រាក់កម្ចីកាន់តែធំជាងមុន ដើម្បីជួយដល់អ៊ុយក្រែន៕