ក្រសួងការពារជាតិ បាននិយាយកាលពីថ្ងៃអង្គារថា កងកម្លាំងរុស្ស៊ី បានចាប់ផ្តើមសមយុទ្ធដំណាក់កាលដំបូង ដែលមានការហ្វឹកហ្វឺនជាក់ស្តែងក្នុងការរៀបចំ និងការប្រើប្រាស់អាវុធនុយក្លេអ៊ែរមិនមែនយុទ្ធសាស្ត្រ។ ប្រធានាធិបតី លោក Vladimir Putin បានបញ្ជាឱ្យធ្វើសមយុទ្ធកាលពីដើមខែនេះ។

ក្រសួងការបរទេសរុស្ស៊ី បានដកស្រង់ការអត្ថាធិប្បាយរបស់ប្រធានាធិបតីបារាំង លោក Emmanuel Macron ដែលបានស្នើលទ្ធភាពនៃការបញ្ជូនទាហានអឺរ៉ុបទៅប្រយុទ្ធជាមួយរុស្ស៊ី នៅអ៊ុយក្រែន ហើយរដ្ឋមន្ត្រីការបរទេសអង់គ្លេស លោក David Cameron បាននិយាយថា អ៊ុយក្រែនមានសិទ្ធិប្រើប្រាស់អាវុធ ដែលផ្តល់ដោយទីក្រុងឡុងដ៍្រ ដើម្បីវាយប្រហារគោលដៅនៅក្នុងប្រទេសរុស្ស៊ី។

ក្រុមអ្នកវិភាគផ្នែកសន្តិសុខ បាននិយាយថា សមយុទ្ធនេះត្រូវបានរៀបចំឡើង ជាសញ្ញាព្រមានដោយលោកPutin ដើម្បីរារាំងប្រទេសលោកខាងលិចពីការឈានជើងចូលកាន់តែជ្រៅទៅក្នុងសង្រ្គាមនៅអ៊ុយក្រែន ជាកន្លែងដែលខ្លួនបានផ្តល់សព្វាវុធ និងការស៊ើបការណ៍សម្ងាត់ដល់ទីក្រុងគីវ ប៉ុន្តែបដិសេធមិនបញ្ជូនកងទ័ព។

ក្រសួងការពារជាតិ បាននិយាយថា ដំណាក់កាលដំបូងនៃការធ្វើសមយុទ្ធនេះ ពាក់ព័ន្ធទៅនឹងមីស៊ីល Iskander និងមីស៊ីល Kinzhal ។

ក្រសួងបាននិយាយថា សមយុទ្ធ មានគោលបំណងធានាថា អង្គភាព និងយុទ្ធោបករណ៍ បានត្រៀមរួចរាល់សម្រាប់ការប្រយុទ្ធដោយប្រើប្រាស់អាវុធនុយក្លេអ៊ែរពុំមែនយុទ្ធសាស្ត្រ ដើម្បីឆ្លើយតប និងធានាចំពោះបូរណភាពទឹកដី និងដែនអធិបតេយ្យភាពរបស់រដ្ឋរុស្ស៊ី ដោយគ្មានលក្ខខណ្ឌ ក្នុងការឆ្លើយតបទៅនឹងសេចក្តីថ្លែងការណ៍បង្កហេតុ និងការគំរាមកំហែងរបស់មន្ត្រីប្រទេសលោកខាងលិច ប្រឆាំងសហព័ន្ធរុស្ស៊ី។

សមយុទ្ធនេះ ក៏មានការចូលរួមពីកងកម្លាំងអង្គភាពមីស៊ីលនៅក្នុងតំបន់យោធាភាគខាងត្បូងរបស់រុស្ស៊ី នៅជាប់ប្រទេសអ៊ុយក្រែន ហើយក៏រួមមានទាំងផ្នែកមួយចំនួននៅអ៊ុយក្រែន ដែលរុស្ស៊ីគ្រប់គ្រងនៅពេលនេះ។ ប្រទេសបេឡារុស្ស ជាកន្លែងដែលរុស្ស៊ី បាននិយាយកាលពីឆ្នាំមុនថា ខ្លួនកំពុងដាក់ពង្រាយអាវុធនុយក្លេអ៊ែរតាកទិក ក៏នឹងចូលរួមក្នុងសមយុទ្ធនេះផងដែរ។