អ្នកដំណើរ និងបុគ្គលិកលើយន្តហោះជាង ១៤០ នាក់ មកពីជើងហោះហើរសិង្ហបុរីអ៊ែរឡាញ (SIA) ដែលរងគ្រោះដោយភាពច្របូកច្របល់យ៉ាងធ្ងន់ធ្ងរបណ្តាលឱ្យមនុស្សរាប់សិបនាក់រងរបួស និងមនុស្សម្នាក់ស្លាប់ បានទៅដល់ប្រទេសសិង្ហបុរី តាមជើងហោះហើរសង្គ្រោះនៅព្រឹកថ្ងៃពុធ (២២ ឧសភា) នេះ បន្ទាប់ពីការចុះចតបន្ទាន់នៅទីក្រុងបាងកក។

ជើងហោះហើរពីទីក្រុងឡុងដ្រ៍ ទៅសិង្ហបុរី SQ312 នៅលើយន្តហោះ ប៊ូអ៊ីង ៧៧៧-៣០០ អ៊ីអា (Boeing 777-300ER) ដែលមានអ្នកដំណើរចំនួន ២១១ នាក់ រួមទាំងជនជាតិអូស្ត្រាលី ជនជាតិអង់គ្លេស និងសិង្ហបុរីជាច្រើននាក់ និងបុគ្គលិក ១៨ នាក់ បានបង្វែរទិសដៅទៅកាន់ទីក្រុងបាងកក បន្ទាប់ពីយន្តហោះនោះត្រូវបានប៉ះទង្គិចដោយចរន្តខ្យល់ខ្លាំងលើអាកាសបណ្ដាលឱ្យយន្តហោះរង្គើរបង្កជាចលាចលដែលបក់បោកអ្នកដំណើរ និងបុគ្គលិកអាកាសចរណ៍ជុំវិញកាប៊ីន។ អ្នកដំណើរជនជាតិអង់គ្លេស វ័យ ៧៣ ឆ្នាំម្នាក់ បានស្លាប់ដោយសង្ស័យថាគាំងបេះដូង និងយ៉ាងហោចណាស់មនុស្ស ៣០ នាក់បានរងរបួស។

ក្រុមហ៊ុនអាកាសចរណ៍សិង្ហបុរី បានដឹកអ្នកដំណើរ ១៣១ នាក់ និងបុគ្គលិក ១២ នាក់នៅលើជើងហោះហើរសង្គ្រោះពីទីក្រុងបាងកក ដែលបានទៅដល់ប្រទេសសិង្ហបុរីមុនម៉ោង ៥ ព្រឹក (ម៉ោងក្នុងស្រុក) ខណៈអ្នករងរបួស និងក្រុមគ្រួសាររបស់ពួកគេនៅតែស្ថិតនៅក្នុងទីក្រុងបាងកក។

ការិយាល័យស៊ើបអង្កេតសុវត្ថិភាពដឹកជញ្ជូនរបស់សិង្ហបុរី (TSIB) កំពុងត្រួតពិនិត្យមើលឧប្បត្តិហេតុនេះ ហើយក្រុមប្រឹក្សាសុវត្ថិភាពដឹកជញ្ជូនជាតិរបស់សហរដ្ឋអាមេរិក ក៏កំពុងបញ្ជូនអ្នកតំណាងសម្រាប់ការគាំទ្រផងដែរ។ ក្រុមហ៊ុនអាកាសចរណ៍បាននិយាយថា ភាពច្របូកច្របល់ភ្លាមៗនោះបានកើតឡើងនៅលើអាងទន្លេ អ៊ីរ៉ាវ៉ាឌី (Irrawaddy) ក្នុងប្រទេសមីយ៉ាន់ម៉ា ប្រហែល ១០ ម៉ោងក្នុងការហោះហើរ។ ភាពច្របូកច្របល់លើអាកាសមានមូលហេតុជាច្រើន ដែលច្បាស់បំផុតនោះគឺដោយសារលំនាំអាកាសធាតុមិនស្ថិតស្ថេរដែលបង្កជាព្យុះ ប៉ុន្តែការហោះហើរនេះអាចរងផលប៉ះពាល់ដោយចរន្តខ្យល់ខ្លាំងដែលពិបាកដឹងជាមុន៕