ប្រធានក្រុមហ៊ុនអាកាសចរណ៍សិង្ហបុរី បានសុំអភ័យទោស និងបានចូលរួមរំលែកទុក្ខ ចំពោះគ្រួសារសពរបស់អ្នកដំណើរបុរសម្នាក់ដែលបានស្លាប់ បន្ទាប់ពីជើងហោះហើរមួយកាលពីថ្ងៃអង្គារទី២១ឧសភា ត្រូវបានរងការប៉ះទង្គិចដោយភាពចលាចលយ៉ាងធ្ងន់ធ្ងរ ព្រមទាំងបណ្ដាលឲ្យមនុស្សរាប់សិបនាក់រងរបួស។

លោក ហ្គ័រ ជុន ផុង (Goh Choon Phong) បាននិយាយថា ក្រុមហ៊ុនអាកាសចរណ៍មានការសោកស្តាយយ៉ាងខ្លាំង ចំពោះបទពិសោធន៍ដ៏ឈឺចាប់ សម្រាប់អ្នកនៅលើជើងហោះហើរ SQ321 ហោះចេញពីទីក្រុងឡុងដ៍្រ ទៅកាន់ប្រទេសសិង្ហបុរី។ ជើងហោះហើរនេះ ត្រូវបានបង្ខំឱ្យចុះចតជាបន្ទាន់នៅក្នុងរដ្ឋធានីបាងកករបស់ប្រទេសថៃ។

អ្នកដំណើរប្រមាណ ៧៩នាក់ និងសមាជិកអាកាសយានិក ៦នាក់ កំពុងស្ថិតនៅក្រុងបាងកក ជាទីដែលអ្នកដំណើរទាំងនោះកំពុងទទួលការព្យាបាលរបួស។ជើងហោះហើរសង្គ្រោះមួយដឹកអ្នកដំណើរ និងសមាជិកអាកាសយានិក ដែលនៅសេសសល់បានទៅដល់ប្រទេសសិង្ហបុរីនៅព្រឹកថ្ងៃពុធនេះ។

យន្តហោះដែលមានអ្នកដំណើរ ចំនួន២១១ នាក់ និងសមាជិកអាកាសចរណ៍ចំនួន១៨ នាក់នៅលើយន្តហោះនោះ បានជួបភាពច្របូកច្របល់យ៉ាងធ្ងន់ធ្ងរនៅលើមហាសមុទ្រឥណ្ឌាដោយសារតែខ្យល់បោកបក់ខ្លាំង ហើយបានធ្លាក់ចុះជាង៦.០០០ហ្វីត ឬស្មើ ១.៨០០ ម៉ែត្រ ក្នុងរយៈពេលបីនាទី។នៅក្នុងសេចក្តីថ្លែងការណ៍ជាវីដេអូមួយនៅថ្ងៃពុធនេះ លោក ហ្គ័រ បាននិយាយថា ក្រុមហ៊ុនអាកាសចរណ៍ កំពុងសហការយ៉ាងពេញទំហឹងជាមួយក្រុមអាជ្ញាធរពាក់ព័ន្ធលើការស៊ើបអង្កេត ។

លោកក៏បានចូលរួមរំលែកទុក្ខដល់ក្រុមគ្រួសារជនរងគ្រោះផងដែរ ដោយបន្ថែមថា ពួកគេនឹងផ្តល់ជំនួយដែលអាចធ្វើទៅបាន ដល់អ្នកដំណើរ និងសមាជិកអាកាសយានិក ដែលរងផលប៉ះពាល់។

បុរសជនជាតិអង់គ្លេសវ័យ៧៣ ឆ្នាំម្នាក់ឈ្មោះ ចូហ្វ ឃីតឈិន (Geoff Kitchen) បានស្លាប់ដែលគេសង្ស័យថាដោយសារគាំងបេះដូងអំឡុងពេលហោះហើរ ខណៈមនុស្សមួយចំនួនទៀតស្ថិតក្នុងស្ថានភាពធ្ងន់ធ្ងរ៕