ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានស្នើទៅចក្រភពអង់គ្លេសឱ្យផ្ដល់វ៉ាក់សាំងបង្ការជំងឺកូវីដ-១៩បន្ថែមទៀតមកដល់កម្ពុជា និងសម្របសម្រួលដល់ការបញ្ជាទិញវ៉ាក់សាំងនេះពីកម្ពុជាផងដែរ។
សម្ដេចតេជោ ហ៊ុន សែន បានថ្លែងបែបនេះនៅក្នុងពិធីប្រគល់-ទទួលវ៉ាក់សាំងប្រភេទ AstraZeneca ចំនួន ៤១៥,០០០ដូស ជាជំនួយរបស់ចក្រភពអង់គ្លេស ដែលបានដឹកជញ្ជូនមកដល់កម្ពុជានៅរសៀលថ្ងៃនេះ។
ក្នុងពិធីនោះ សម្ដេចតេជោ ហ៊ុន សែន បានថ្លែងអំណរគុណទឹកចិត្តសប្បុរសរបស់រដ្ឋាភិបាលចក្រអង់គ្លេស ដែលបានរួមចំណែកដល់កិច្ចខិតខំប្រឹងប្រែងប្រយុទ្ធប្រឆាំងនឹងការឆ្លងរាលដាលនៃជំងឺកូវីដ-១៩នៅក្នុងប្រទេសកម្ពុជា។
ប្រមុខរាជរដ្ឋាភិបាលកម្ពុជា ក៏បានស្នើផងដែរទៅចក្រភពអង់គ្លេសផ្ដល់ជំនួយវ៉ាក់សាំងប្រភេទ AstraZeneca នេះមកដល់កម្ពុជាបន្ថែមទៀត ខណៈដែលកម្ពុជាកំពុងតែធ្វើយុទ្ធនាការចាក់វ៉ាក់សាំងបង្ការជំងឺកូវីដ-១៩ជូនប្រជាពលរដ្ឋ។
ជាងនេះទៀត សម្ដេចតេជោ ហ៊ុន សែន ក៏បានស្នើទៅចក្រភពអង់គ្លេសឱ្យជួយសម្របសម្រួលដល់កម្ពុជាបញ្ជាទិញវ៉ាក់សាំងប្រភេទនេះផងដែរ។
កម្ពុជាបានចាប់ផ្ដើមយុទ្ធនាការចាក់វ៉ាក់សាំងជូនប្រជាពលរដ្ឋរបស់ខ្លួនចាប់តាំងពីថ្ងៃទី១០ ខែកុម្ភៈកន្លងមកនេះ ដោយចាក់ជូនប្រជាពលរដ្ឋបានជាង ៧លាន ៧០ម៉ឺននាក់រួចហើយ ឬសម្រេចបានជាង ៧៥ភាគរយ៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
