រដ្ឋបាលរាជធានីភ្នំពេញដោយមានការយកចិត្តទុកដាក់ពីឯកឧត្តម ឃួង ស្រេង អភិបាលរាជធានីភ្នំពេញបានចាត់ឱ្យមន្ទីរសាធារណៈការរាជធានីភ្នំពេញបន្តយកចិត្តទុកដាក់និងផ្លាស់ប្ដូរប្រព័ន្ធលូតូចចេញដាក់ទំហំធំជាងមុនដើម្បីបញ្ជៀសទឹកឲ្យបានលឿន។

ជាក់ស្ដែងនៅតាមបណ្ដោយផ្លូវលេខ២៣០ កែងជាមួយមហាវិថីម៉ៅសេទុង ជាប់របងមជ្ឈមណ្ឌលម៉ុងឌីយ៉ាល់និងផ្សារនាគមាស ស្ថិតនៅមូលដ្ឋា សង្កាត់ផ្សារដើមគរ ខណ្ឌទួលគោក ដែលកន្លងមកនៅតំបន់នេះឲ្យតែមានភ្លៀងធ្លាក់ម្ដងៗតែងតែជនលិចលើផ្លូវធ្វើឲ្យប្រជាពលរដ្ឋធ្វើដំណើរលំបាកក្នុងការធ្វើដំណើរ។ ដូច្នេះ ដោយមានការយកចិត្តទុកដាក់ពីឯកឧត្តម ឃួង ស្រេង អភិបាលរាជធានីភ្នំពេញបានចាត់ឱ្យមន្ទីសាធារណការរាជធានីភ្នំពេញឲ្យចុះត្រួតពិនិត្យនិងធ្វើការផ្លាស់ប្ដូរប្រព័ន្ធលូតូចដាក់ប្រព័ន្ធលូធំជាងមុនដើម្បីរំដោះទឹកឲ្យបានលឿនជៀសវាងការជន់លិច។

តាមមន្ត្រីជំនាញបានឲ្យដឹងថានៅចំណុចកំណាត់ផ្លូវលេខ ២៣០ នេះគឺជាគម្រោងរបស់រដ្ឋបាលរាជធានីភ្នំពេញដោយសង្កេតឃើញថាកន្លងមកនៅតំបន់ផ្លូវលេខ២៣០ កែងនឹងមហាវិថីម៉ៅសេទុងនេះតែងតែជនលិចពេលមានភ្លៀងធ្លាក់ម្ដងៗ ។ដូច្នេះត្រូវបានផ្លាស់ប្ដូរប្រព័ន្ធលូរពីតូចមកធំដោយដាក់ទំហំមុខកាត់មួយម៉ែត្រកន្លះ។

ជាចុងក្រោយអាជ្ញាធរបានសំណូមពរដល់ប្រជាពលរដ្ឋដែលមានលំនៅដ្ឋាន និងអាជីវករដែលលក់ដូរតាមដោយផ្លូវលេខ ២៣០ សូមមេត្តាយោគយល់ចំពោះការដ្ឋានកំពុងសាងសង់និងដាក់លូរ ដែលមានការប៉ះពាល់ដល់ប្រជាពលរដ្ឋ។ ហើយក៏សំណូមពរប្រជាពលរដ្ឋឲ្យវេចខ្ចប់សម្រាមដាក់ឲ្យបានត្រឹមត្រូវជៀសវាងពេលមានភ្លៀងធ្លាក់សំរាមហូរចូលក្នុងប្រព័ន្ធលូរបង្ករឲ្យមានការកកស្ទះផ្លូវទឹក៕ អត្ថបទ៖ កុម្ភៈ