​អូឡាំពិក៖ ​អត្ត​ព​លិ​ក​ហូ​ឡង់​កីឡា​ការិនី Anouk Vetter គឺជា​អ្នក​នាំ​មុខ​គេ​ក្រោយ​ថ្ងៃ​ទី​១ នៅ​ថ្ងៃ​ពុធ​ម្សិលមិញ​នៃ​ការប្រកួត​វិញ្ញាសា​កីឡា​ហេ​ប​តា​ត្លុង តែ​មិន​មែន​ជា​ថ្ងៃ​ល្អ​ឡើង​សំរាប់​ជើងឯក​ពិភព​លោក​កីឡា​ការិនី​អង់គ្លេស Katarina Johnson-Thompson​។

​​តាមពិតទៅ​កីឡាការិនី Johnson-Thompson គឺជា​អ្នក​នាំមុខគេ​ម្នាក់​ក្នុងការ​ប្រកួត​នេះ តែ​បែរ​ជា​មាន​របួស​ក្នុង​ដំណាក់កាល​រត់ ២០០​ម៉ែត្រ។ ​របួស​ហើយ Thompson មិន​ត្រូវ​ការ​អ្នក​ជួយ​ឡើយដោយ​ព្យាយាម​រត់​ទាំង​ឈឺ​ឱ្យ​ដល់​ទី​ព្រ័ត្រ​ ទោះបីជា​ដឹងខ្លួន​ថា​ មិន​អាច​បន្ត​ដំណាក់កាល​ផ្សេងទៀត​បាន​ក៏ដោយ​។​ ​កីឡា​ការិនី​ហូ​ឡង់ Anouk Vetter ក៏​ក្លាយ​ជា​អ្នក​ដែល​ធ្វើ​បាន​ពិន្ទុ​ច្រើន​ជាង​គេ ២៧​ពិន្ទុ​នាំមុខ​លើ​កីឡា​ការិនី​ប៊ែ​ល​ហ្ស៊ិ​ក Noor Vidts​។ ​​Heptathlon គឺជា​វិញ្ញាសា​កីឡា​ដែល​រួមបញ្ចូល​គ្នា​ដោយ ៧វិញ្ញាសា​ប្រកួត​ដោយ​អត្ត​ព​លិ​ក​តែ​ម្នាក់​ប៉ុណ្ណោះ​រួមមាន​វិញ្ញាសា​រត់ ១០០​ម៉ែត្រ, ផ្លោះ​របង, លោត​កម្ពស់, ចោល​ដុំដែក, រត់ ២០០​​ម៉ែត្រ, លោត​ចម្ងាយ, ចោល​ថ្នោល និង​រត់ ៨០០​​ម៉ែត្រ​។

​​ទៅ​ណា​មិន​ឆ្ងាយ​ពី​កីឡាអត្តពលកម្ម កីឡា​ការិនី​ហូ​ឡង់ Sifan Hassan បាន​ឈានឡើង​វគ្គ​ផ្ដាច់ព្រ័ត្រ​វិញ្ញាសា​រត់ ១៥០០​​ម៉ែត្រ ស្របពេល​ដែល​នាង​ក៏​កំពុង​ស្វែង​មេដាយ​នៅ ​២​វិញ្ញាសា​ទៀត​គឺ​រត់ ៥០០០​​ម៉ែត្រ និង ១០០០០​ម៉ែត្រ​។ ​​ងាក​មក​កីឡា​ក្នុង​ទឹក ក្រុម​អត្ត​ព​លិ​ក​របស់​រុស្ស៊ី​បានឈ្នះ​មេដាយមាស​វិញ្ញាសា​សម្ដែង​ក្នុង​ទឹក​លក្ខណៈ​ជា​គូ​នារី ​ដែលមាន​កីឡាការិនី Svetlana Kolesnichenko និង​កីឡាការិនី Svetlana Romashina​។ ​​ចុងក្រោយ​នេះ​គឺ​វិញ្ញាសា​កីឡា​ឡើង​ជញ្ជាំង​ផ្នែក​នារី កីឡាការិនី​ស្លូ​វេ​នី Janja Garnbret គឺជា​អ្នកទទួលបាន​ជ័យជំនះ​ឈានឡើង​វគ្គ​ផ្តាច់ព្រ័ត្រ​នៅថ្ងៃនេះ​៕

​អត្ថបទ​៖​នាង សុភា​វុ​ធ