សិស្សពូកែកម្ពុជា ចំនួន ៩រូប បច្ចុប្បន្នកំពុងទទួលការបណ្ដុះបណ្ដាលពិសេស ដើម្បីត្រៀម​ខ្លួន​ចេញ​​​ទៅប្រកួតប្រជែងក្នុងការប្រឡងគណិតវិទ្យា និងរូបវិទ្យាជាលក្ខណៈអន្តរជាតិ នៅខែ កក្កដា ឆ្នាំ ២០២៤ខាងមុខ។ សិស្សមួយ​ក្រុមត្រូវទៅចូលរួម​ប្រកួតក្នុង​ការ​ប្រឡង​គណិតវិទ្យា​អូឡាំព្យាដ​អន្តរជាតិ នៅចក្រ​ភព​អង់គ្លេស រីឯសិស្សមួ​យ​ក្រុម​ទៀត​ត្រូវ​ចូលរួម​ប្រកួត​ក្នុង​ការ​ប្រឡង​រូប​វិទ្យា​អូឡាំព្យាដ​អន្តរជាតិ​នៅ​ប្រទេស អ៊ីរ៉ង់។

ក្រសួងអប់រំ យុវជន និងកីឡា បច្ចុប្បន្នកំពុងធ្វើការបណ្ដុះបណ្ដាលជា​ពិសេស​សម្រាប់​យុវជ​ន​ចំនួន ៩នាក់ ដែលត្រៀមខ្លួនចេញទៅប្រកួតប្រជែងតំណាងកម្ពុជា ក្នុង​ព្រឹត្តិការណ៍​ប្រឡង​គណិត​វិទ្យា​អូឡាំព្យាដអន្តរជាតិ នៅចក្រភពអង់គ្លេស និងការប្រឡងរូបវិ​ទ្យា​អូឡាំព្យាដ​អន្តរជាតិ​នៅ​ប្រទេស អ៊ីរ៉ង់។ សិស្សពូកែទាំង ៩រូបនេះ ពួកគេជាអតីតសិស្សពូកែទូទាំងប្រទេសថ្នាក់ទី ៩ លើ​មុខ​វិជ្ជា​គណិត និងរូបវិទ្យាកាលពីឆ្នាំ ២០២២។

ជាការត្រៀមសម្រាប់ព្រឹត្តិការណ៍ដ៏ធំខាងមុខនេះ ក្រសួងអប់រំ យុវជន និងកីឡា បានបញ្ជូន​អតីត​សិស្ស​ពូកែទាំងនោះ មកបណ្ដុះបណ្ដាលជាពិសេសរយៈពេល ៣ខែ នៅសាកលវិទ្យាល័យ​ភូមិន្ទ​ភ្នំពេញ​។ នេះជាការលើកឡើងរបស់ លោក គឹម ថាច ប្រធានការិយាល័យ​ប្រឡង​ជ្រើស​រើស​សិស្ស​ពូកែ​ថ្នាក់ជាតិ និងអន្តរជាតិ នៃនាយកដ្ឋានកិច្ចការបប្រឡង ក្រសួងអប់រំ យុវជន និង​កីឡា​។

លោកលើកឡើងថា នេះជាឱកាសដ៏វិសេសវិសាល ដែលយុវជនកម្ពុជា នឹងកាន់ទង់​ជាតិ​បង្ហាញ​ពី​ប្រទេ​សកម្ពុជា ចូលរួមក្នុងព្រឹត្តិការណ៍ប្រកួតប្រជែងជាលក្ខណៈអន្តរជាតិ។ លោកបញ្ជាក់ថា ការ​ប្រឡងគណិតវិទ្យាអូឡាំព្យាដអន្តរជាតិ នៅចក្រភពអង់គ្លេស ក្នុងឆ្នាំ ២០២៤នេះ នឹងមាន​ប្រទេស​ចូល​រួមជាង ១០០ប្រទេស រីឯការប្រឡងរូបវិទ្យាអូឡាំព្យាដអន្តរជាតិនៅប្រទេស អ៊ីរ៉ង់ មាន​ការចូលរួមជិត ១០០ប្រទេសផងដែរ។

កំឡុងពេលសិក្សាពិសេសរយៈពេលជិត ៣ខែ មកនេះ ទាំងសិស្សត្រៀមទៅប្រកួតនៅ​ចក្រ​ភព​អង់គ្លេស និងសិស្សត្រៀមទៅប្រកួតនៅប្រទេស អ៊ីរ៉ង់ ម្នាក់ៗខិតខំប្រឹងប្រែងជាខ្លាំង។ ពួក​គេ​មើល​ឃើញ​ថា ការប្រឡងនៅពេលខាងមុខ ជាការប្រកួតប្រជែងដ៏ធំ ដែលវាពុំមែ​ន​ជា​រឿង​ងាយ​ស្រួល​នោះ​ទេ។​ ពួកគេក្នុងនាមជាយុវជនកម្ពុជា គឺនឹងប្រឹងប្រែង​ឱ្យអ​ស់​ពី​សមត្ថភាព​សម្រាប់​ការ​ប្រឡង​ដ៏​ធំនេះ។

កន្លងទៅតាមរយៈការបញ្ជូនសិស្សទៅចូលរួមការប្រកួតលក្ខណៈជាអន្តរជាតិ របស់ក្រសួងអប់រំ យុវជន និងកីឡា ក៏ធ្លាប់ទទួលបានពានរង្វាន់ត្រឡប់មកវិញផងដែរ។ ជាក់ស្ដែងនៅឆ្នាំ ២០១៦ សិស្ស​នៅវិទ្យាល័យបាក់ទូក ១រូប ទទួលបានពានរង្វាន់កិត្តិយស ១គ្រឿង សម្រាប់​ការ​ចូលរួម​ក្នុង​ការ​ប្រឡង​គណិតវិទ្យាអូឡាំព្យាដ អន្តរជាតិលើកទី ៥៧ នៅទីក្រុង ហុងកុង ប្រទេសចិន។ នៅ​ក្នុង​ឆ្នាំ២០១៩ សិស្សកម្ពុជា មកពីខេត្ត សៀមរាប ១រូបទៀតក៏ទទួលបានពានរង្វាន់កិត្តិយស មក​ពី​ចក្រភពអង់គ្លេសក្នុងការចូលរួមប្រកួតប្រជែង ការប្រឡងគណិតវិទ្យាអូឡាំព្យាដ អន្តរជាតិ​នៅ​ចក្រ​ភពអង់គ្លេសផងដែរ៕ អត្ថបទ៖ គឹមហុក