នាយករដ្ឋមន្ត្រីកូរ៉េខាងត្បូង លោក ហាន ដុកស៊ូ (Han Duck-soo) បាននិយាយនៅក្នុងពិធីបើកវេទិកាសកលនៃបច្ចេកវិទ្យាប្រាជ្ញាសិប្បនិម្មិត (AI) នៅទីក្រុងសេអ៊ូល នៅថ្ងៃពុធ (២២ ឧសភា) នេះថា សុវត្ថិភាពគឺជា «អាទិភាព» ក្នុងការប្រើប្រាស់ប្រាជ្ញាសិប្បនិម្មិត។ វេទិកាពិភពលោករយៈពេលមួយថ្ងៃនេះកំពុងត្រូវបានប្រារព្ធឡើងព្រមគ្នាជាមួយនឹងកិច្ចប្រជុំកំពូលពិភពលោក AI លើកទីពីរ ដែលជាព្រឹត្តិការណ៍រយៈពេលពីរថ្ងៃ។

នៅថ្ងៃដំបូងនៃកិច្ចប្រជុំកំពូលពិភពលោក AI កាលពីថ្ងៃអង្គារ (២១ ឧសភា) ក្រុមហ៊ុនចំនួន ១៦ ស្ថាប័ននៅជួរមុខនៃការអភិវឌ្ឍន៍ AI បានសន្យាថានឹងអភិវឌ្ឍបច្ចេកវិទ្យានេះប្រកបដោយសុវត្ថិភាពនៅពេលនិយតករកំពុងព្យាយាមដើម្បីដើរឱ្យទាន់ភាពច្នៃប្រឌិតយ៉ាងឆាប់រហ័ស និងហានិភ័យដែលកំពុងកើតឡើង។

ក្រុមហ៊ុនទាំងនោះរួមមាន ស្ថាប័នធំៗដែលមេដឹកនាំសហរដ្ឋអាមេរិកដូចជា ហ្គូហ្គល (Google), មេតា (Meta), ម៉ៃក្រូសហ្វ (Microsoft) និង អូភេន អេអាយ (OpenAI) ព្រមទាំងក្រុមហ៊ុនមកពីប្រទេសចិន កូរ៉េខាងត្បូង និងអារ៉ាប់រួម។

ក្រុមហ៊ុនទាំងនោះត្រូវបានគាំទ្រដោយការប្រកាសយ៉ាងទូលំទូលាយពីក្រុមប្រទេសសេដ្ឋកិច្ចធំៗទាំងប្រាំពីរ (G7) សហភាពអឺរ៉ុប សិង្ហបុរី អូស្ត្រាលី និងកូរ៉េខាងត្បូងនៅឯកិច្ចប្រជុំអនឡាញមួយ។ ការិយាល័យប្រធានាធិបតីកូរ៉េខាងត្បូងបាននិយាយថា ប្រជាជាតិនានាបានយល់ព្រមផ្តល់អាទិភាពដល់សុវត្ថិភាព AI ការច្នៃប្រឌិត និងការរួមបញ្ចូលដើម្បីធានាសុវត្ថិភាពសម្រាប់ប្រព័ន្ធបច្ចេកវិទ្យាទំនើបមួយនេះ៕