អ្នកដំណើរដែលរងរបួសដោយភាពច្របូកច្របល់យ៉ាងធ្ងន់ធ្ងរនៅលើជើងហោះហើរ សិង្ហបុរីអ៊ែរឡាញស៍ (Singapore Airlines) កាលពីថ្ងៃអង្គារ (២១ ឧសភា) ទំនងជាមានសិទ្ធិទទួលបានសំណង ប៉ុន្តែចំនួនទឹកប្រាក់ដែលទទួលបានអាចខុសគ្នាយ៉ាងខ្លាំង ទោះជាមានការរងរបួសដូចគ្នាដោយយោងតាមសន្ធិសញ្ញាអន្តរជាតិក៏ដោយ។

អ្នកដំណើរម្នាក់បានស្លាប់ ហើយក្រុមហ៊ុនអាកាសចរណ៍បាននិយាយថា អ្នកដំណើរ ៣០ នាក់ត្រូវបានព្យាបាលរបួស បន្ទាប់ពីជើងហោះហើរពីទីក្រុងឡុងដ៍្រ ទៅកាន់ប្រទេសសិង្ហបុរី បានចុះចតជាបន្ទាន់នៅទីក្រុងបាងកក កាលពីថ្ងៃអង្គារ។

នៅក្រោមអនុសញ្ញាទីក្រុងម៉ុងរ៉េអាល់ ក្រុមហ៊ុនអាកាសចរណ៍សិង្ហបុរីត្រូវទទួលខុសត្រូវចំពោះគ្រោះថ្នាក់នានា ដែលអាចរួមបញ្ចូលភាពចលាចលនៅលើជើងហោះហើរអន្តរជាតិ ដោយមិនគិតពីថាតើក្រុមហ៊ុនអាកាសចរណ៍នេះមានការធ្វេសប្រហែស ឬយ៉ាងណានោះទេ នេះបើយោងតាមមេធាវីអាកាសចរណ៍សហរដ្ឋអាមេរិក។ ប្រសិនបើអ្នកដំណើរដាក់ពាក្យប្ដឹង ក្រុមហ៊ុនអាកាសចរណ៍មិនអាចដោះស្រាយលើសំណងការខូចខាតឱ្យលើសពីទំហំទឹកប្រាក់ប្រហែល ១៧៥.០០០ ដុល្លារបានទេ។

លោក ម៉ៃ ដានខូ (Mike Danko) មេធាវីរដ្ឋកាលីហ្វ័រនីញ៉ា ដែលតំណាងឱ្យអ្នកដំណើរបាននិយាយថា ប្រសិនបើអ្នកដំណើរទាមទារសំណងខូចខាតធំជាងនេះ ក្រុមហ៊ុនអាកាសចរណ៍សិង្ហបុរីអាចព្យាយាមកំណត់ការទទួលខុសត្រូវ ដោយបង្ហាញថាខ្លួនបានចាត់វិធានការចាំបាច់ទាំងអស់ដើម្បីជៀសវាងភាពចលាចលនេះ។ លោកនិយាយថា ក្រុមហ៊ុនអាកាសចរណ៍កម្រឈ្នះបណ្ដឹងដោយប្រើអំណះអំណាងបែបនេះណាស់។

ជាឧទាហរណ៍ គណៈវិនិច្ឆ័យរបស់សហរដ្ឋអាមេរិក បានកាត់ក្ដីឱ្យអ្នកដំណើរទទួលបានជាង ១ លានដុល្លារសម្រាប់ការប៉ះទង្គិចផ្លូវចិត្តដោយសារភាពចលាចលធ្ងន់ធ្ងរ ខណៈដែលតុលាការជាច្រើននៅក្នុងប្រទេសផ្សេងទៀតផ្តល់ឱ្យតិចជាងនេះសម្រាប់បញ្ហាស្រដៀងគ្នា៕