នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បានបដិសេធការចោទប្រកាន់ដែលថា លោកកំពុងបង្អត់អាហារប្រជាជនប៉ាឡេស្ទីន នៅតំបន់ហ្កាហ្សា ជាវិធីសាស្រ្តនៃសង្គ្រាម នៅក្នុងបទសម្ភាសន៍ជាមួយអ្នកសារព័ត៌មានទូរទស្សន៍ CNN លោក Jake Tapper កាលពីថ្ងៃអង្គារ ដោយនិយាយថា ពាក្យសុំដីកាចាប់ខ្លួនបច្ចុប្បន្ន កំពុងស្ថិតក្រោមការត្រួតពិនិត្យ នៅក្នុងតុលាការឧក្រិដ្ឋកម្មអន្តរជាតិ (ICC) គឺផ្អែកលើ «កញ្ចប់នៃការភូតកុហក។

រដ្ឋអាជ្ញាតុលាការ ICC លោក Karim Khan បានប្រកាសកាលពីថ្ងៃចន្ទថា លោកបានស្នើសុំដីកាចាប់ខ្លួនមេដឹកនាំក្រុមហាម៉ាសចំនួន បីរូប និងអ្នកនយោបាយអ៊ីស្រាអែលពីររូប គឺលោក ណេតាន់យ៉ាហ៊ូ និងរដ្ឋ    មន្ត្រីការពារជាតិអ៊ីស្រាអែលលោក យ៉ូអាវ ហ្គាឡែនធ៍ (Yoav Gallant) ជុំវិញការចោទប្រកាន់ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិពាក់ព័ន្ធការវាយប្រហារកាលពីថ្ងៃទី៧ ខែតុលា នៅក្នុងប្រទេសអ៊ីស្រាអែល និងសង្រ្គាមជាបន្តបន្ទាប់ នៅក្នុងតំបន់ហ្កាហ្សា។

លោក Khan បាននិយាយថា ការចោទប្រកាន់លើលោក ណេតាន់យ៉ាហ៊ូ និងលោក ហ្គាឡែនធ៍  រួមមាន «ការបង្ករឲ្យមានការសម្លាប់រង្គាល បង្កឲ្យមានភាពស្រេកឃ្លាន ជាវិធីសាស្រ្តនៃសង្គ្រាម រួមទាំងការបដិសេធការផ្តល់ជំនួយមនុស្សធម៌ ចេតនាដាក់គោលដៅលើជនស៊ីវិល ក្នុងជម្លោះនេះ»។

ថ្លែងទៅកាន់លោក Tapper លោក ណេតាន់យ៉ាហ៊ូ បានហៅលោក Khan ថា ជា «រដ្ឋអាជ្ញាក្លែងក្លាយ ដែលបានដាក់ការចោទប្រកាន់មិនពិត និងបង្កើតភាពស៊ីសង្វាក់គ្នាមិនពិត ដែលមានទាំងគ្រោះថ្នាក់ និងភាពគ្មានការពិត» ហើយបានទទូចថា អ៊ីស្រាអែល បាននិងកំពុងអនុញ្ញាតឲ្យផ្តល់ស្បៀងអាហារ និងជំនួយផ្នែកវេជ្ជសាស្រ្ដ ចូលទៅកាន់តំបន់ហ្កាហ្សា ជាទីដែលក្រុមជំនួយនិយាយថា ដែនដីប៉ាឡេស្ទីនដែលត្រូវបានរារាំង បច្ចុប្បន្ននេះ កំពុងប្រឈមនឹងគ្រោះទុរ្ភិក្ស។ លោក ណេតាន់យ៉ាហ៊ូ បាននិយាយថា អ៊ីស្រាអែល បានអនុញ្ញាតឲ្យរថយន្តដឹកជំនួយចំនួន ២០.000 គ្រឿង ចូលទៅកាន់តំបន់ហ្កាហ្សា ដែលជាចំណែកនៃអ្វីដែលនឹងចូលក្នុងរយៈពេលដូចគ្នា នៅក្រោមពេលវេលាធម្មតា។