ប្រព័ន្ធផ្សព្វផ្សាយកូរ៉េខាងជើង បានផ្សព្វផ្សាយរូបថត ដែលបង្ហាញពីរូបរបស់មេដឹកនាំ លោក Kim Jong Un (គីម ជុងអ៊ុន) ព្យួរយ៉ាងត្រដែតនៅក្បែររូបឪពុក និងជីតារបស់លោក ដែលនេះបញ្ជាក់ឲ្យឃើញកាន់តែច្បាស់នូវការជំរុញជាក់ស្តែង ក្នុងគោលបំណងពង្រឹងឋានៈរបស់មេដឹកនាំរូបនេះឲ្យស្មើនឹងបុព្វបុរសរបស់លោក។

ការបង្ហាញពីរូបថតទាំងនោះ ទំនងជាលើកដំបូងហើយ ដែលបណ្ដាញសារព័ត៌មានរដ្ឋផ្សព្វផ្សាយនូវរូបរបស់លោក ដែលព្យួរក្បែរស្ថាបនិករដ្ឋ លោក Kim Il Sung (គីម អ៊ីលស៊ុង) និងឪពុករបស់លោក គឺលោក Kim Jong Il (គីម ជុងអ៊ីល) ដែលបានគ្រប់គ្រងប្រទេសរហូតដល់ពេលទទួលមរណភាពភ្លាមៗ ក្នុងឆ្នាំ២០១១។

រូបថតដែលបានថតនៅឯពិធីបើកវគ្គបណ្ដុះបណ្ដាលកម្មាភិបាលសាលាថ្មី សម្រាប់គណបក្សពលករ ដែលកំពុងកាន់អំណាច បានបង្ហាញរូបគំនូរពាក់កណ្ដាលខ្លួនដ៏ធំនៃមេដឹកនាំទាំង ៣ជំនាន់ ដែលដាក់នៅលើផ្នែកខាងមុខនៃអគារដ៏ស្កឹមស្កៃ។ នៅក្នុងរូបថតផ្សេងទៀត លោក គីម ត្រូវបានបង្ហាញថា កំពុងនិយាយទៅកាន់ជំនួយការ ក្នុងនោះរួមទាំងនាយខុទ្ទកាល័យ ក្នុងថ្នាក់រៀន ដែលមានរូបមេដឹកនាំទាំង៣ ព្យួរពីលើក្តារខៀននៅខាងមុខ។

ទីភ្នាក់ងារសារព័ត៌មាន KCNA បានរាយការណ៍ថា លោក គីម បានប្រាប់ពិធីបើកថា ទីតាំងរបស់សាលានេះ ត្រូវបានជ្រើសរើស ដោយសារវានៅជិតនឹងវិមាន ដែលសពរបស់លោក គីម អ៊ីលស៊ុង និងលោក គីម ជុងអ៊ីល តម្កល់នៅក្នុងនោះ ដោយលោកបញ្ជាក់ថា ការធ្វើបែបនេះ គឺមានគោលបំណង «ដើម្បីឲ្យមេដឹកនាំដ៏អស្ចារ្យរបស់យើងអាចស្តាប់ឮគ្រប់ពាក្យសម្ដីរបស់សិស្ស សូម្បីតែពេលពួកគេខ្សឹបខ្សៀវគ្នា»។

យ៉ាងណាក្ដី ប្រព័ន្ធផ្សព្វផ្សាយរបស់រដ្ឋមិនបានធ្វើអត្ថាធិប្បាយអំពីចេតនានៅពីក្រោយនៃការដាក់តាំងរូបមេដឹកនាំនេះ ឬលើកឡើងថា តើការធ្វើបែបនោះបានក្លាយជាស្តង់ដារទូទាំងប្រទេស សម្រាប់ទីកន្លែងសាធារណៈ និងថ្នាក់រៀនទាំងអស់ ឬយ៉ាងណា៕