អគ្គសេនាធិការនៃកងកម្លាំងប្រដាប់អាវុធរបស់ប្រទេសអ៊ីរ៉ង់នៅថ្ងៃពុធនេះ បាននិយាយសម្រាលតួនាទីរបស់យានដ្រូនទួរគីក្នុងការស្វែងរកកន្លែងធ្លាក់ឧទ្ធម្ភាគចក្ររបស់លោកប្រធានាធិបតី អ៊ីប្រាហ៊ីម រ៉េស៊ី (Ebrahim Raisi) ដោយគូសបញ្ជាក់ជំនួសឲ្យការប្រើប្រាស់យានដ្រូនរបស់ខ្លួនផ្ទាល់។

កាលពីព្រឹកថ្ងៃចន្ទ ទីភ្នាក់ងារសារព័ត៌មាន Anadolu របស់ប្រទេសទួរគី បានរាយការណ៍ថា យានដ្រូនAkinci របស់ប្រទេសទួរគី បានកំណត់អត្តសញ្ញាណ «ប្រភពនៃកម្តៅដែលគេសង្ស័យថា ជាបំណែកនៃឧទ្ធម្ភាគចក្រដែលដឹកលោកប្រធានាធិបតី រ៉េស៊ី និងចែករំលែកការសម្របសម្រួលរបស់ខ្លួនជាមួយអាជ្ញា  ធរអ៊ីរ៉ង់។

យោធាអ៊ីរ៉ង់ បាននិយាយនៅក្នុងសេចក្តីថ្លែងការណ៍មួយថា៖ «ទោះបីជាប្រទេសទួរគីបញ្ជូនយានដ្រូន ដែលបំពាក់ជាមួយកាមេរ៉ាមើលពេលយប់ និងកាមេរ៉ាស្រូបកម្ដៅក៏ដោយ ក៏យានដ្រូននេះ បានបរាជ័យក្នុងការកំណត់ទីតាំងធ្លាកឧទ្ធម្ភាគចក្រនោះដែរ ដោយសារតែខ្វះឧបករណ៍រាវរក និងចំណុចត្រួតពិនិត្យនៅក្រោមពពក» ដោយគេជឿថា លក្ខខណ្ឌអាកាសធាតុមិនអំណោយផល គឺជាមូលហេតុដែលបណ្តាលឲ្យធ្លាក់នោះ។

ទាំងប្រទេសអ៊ីរ៉ង់ និងទួរគីមានឃ្លាំងដ្រូនដ៏ធំ ហើយបានផ្តោតលើការបង្ហាញពីប្រសិទ្ធភាពនៃយានដ្រូន របស់ពួកគេសម្រាប់ទីផ្សារនាំចេញ។ មហាអំណាចលោកខាងលិច បានចោទប្រកាន់អ៊ីរ៉ង់ថា បានផ្តល់យានដ្រូនដល់រុស្ស៊ីសម្រាប់សង្គ្រាមរបស់ខ្លួន នៅអ៊ុយក្រែន។