ជើងហោះហើររបស់ក្រុមហ៊ុនអាកាសចរណ៍ Emirates បានចុះចតដោយសុវត្ថិភាព នៅទីក្រុង Mumbai របស់ប្រទេសឥណ្ឌា កាលពីយប់ថ្ងៃទី២០ ខែឧសភា បន្ទាប់ពីបានបុកជាមួយហ្វូងសត្វក្រៀលភ្លាមៗមុនពេលចុះចត ដែលហេតុការណ៍នោះបានបណ្ដាលឲ្យយន្តហោះរងការខូចខាត និងសត្វបក្សីស្លាប់ជាច្រើនក្បាល។

ដោយផ្តល់ព័ត៌មានលម្អិតបន្ថែមអំពីឧបទ្ទវហេតុនោះ អ្នកនាំពាក្យរបស់ក្រុមហ៊ុនអាកាសចរណ៍ Emirates នៅថ្ងៃពុធ (ទី២២ ខែឧសភា) នេះ បានបញ្ជាក់ជាមួយសារព័ត៌មាន Reuters ថា ជើងហោះហើរ EK508 ដែលធ្វើដំណើរពីទីក្រុង Dubai (ប្រទេសអារ៉ាប់រួម) ទៅកាន់ទីក្រុង Mumbai បានជួប «ឧបទ្ទវហេតុវាយប្រហារដោយសត្វបក្សីនៅពេលចុះចត»។

សារព័ត៌មាន Times of India បានរាយការណ៍ថា យន្តហោះ Boeing 777 ដែលហោះហើរពីទីក្រុង Dubai ទៅកាន់ទីក្រុង Mumbai បានបុកហ្វូងសត្វបក្សី នៅចម្ងាយប្រហែល ៣០០ម៉ែត្រពីដី ដោយបានបណ្តាលឲ្យសត្វស្លាបស្លាប់ចំនួន ៣៩ក្បាល។

យ៉ាងណាក្ដី អ្នកនាំពាក្យរបស់ក្រុមហ៊ុនអាកាសចរណ៍ Emirates បានបន្ថែមថា ការចុះចតបានប្រព្រឹត្តទៅដោយសុវត្ថិភាព ហើយអ្នកដំណើរទាំងអស់ នៅលើយន្តហោះ គ្មានរបួសស្នាមអ្វីទេ តែយន្តហោះបានរងខូចខាតនៅក្នុងឧបទ្ទវហេតុនេះ ហើយជើងហោះហើរត្រឡប់ ដែលគ្រោងនឹងចេញដំណើរទៅកាន់ទីក្រុង Dubai វិញ នៅថ្ងៃទី២០ ខែឧសភា ត្រូវបានលុបចោល៕