អ្នកនាំពាក្យវិមានក្រឹមឡាំង លោក Dmitry Peskov នៅថ្ងៃពុធ (ទី២២ ខែឧសភា) នេះ បាននិយាយថា ប្រទេសរុស្ស៊ីនឹងចាត់ទុកការរឹបអូសយកប្រាក់ចំណូលពីទ្រព្យសម្បត្តិរបស់ខ្លួន ដែលត្រូវបានបង្កកនៅសហភាពអឺរ៉ុប (EU) ថា ជាការរំលោភលើបទដ្ឋានទាំងអស់នៃប្រព័ន្ធសេដ្ឋកិច្ចពិភពលោក។

គួរបញ្ជាក់ថា រដ្ឋាភិបាលបែលហ្ស៊ិក បាននិយាយនៅសប្តាហ៍នេះថា បណ្តាប្រទេសជាសមាជិករបស់ EU បានអនុម័តជាផ្លូវការនូវផែនការប្រើប្រាស់ប្រាក់ចំណេញពីទ្រព្យនៃធនាគារកណ្តាលរបស់រុស្ស៊ី ដែលត្រូវផ្អឹបទុកនៅ EU សម្រាប់វិស័យការពាររបស់ប្រទេសអ៊ុយក្រែន។

ចំណែកក្រុមប្រទេសមានឧស្សាហកម្មលូតលាស់ទាំង៧ (G7) បានបង្កកមូលធនហិរញ្ញវត្ថុរបស់រុស្ស៊ីដែលមានតម្លៃប្រហែល ៣០០ពាន់លានដុល្លារភ្លាមៗបន្ទាប់ពីទីក្រុងម៉ូស្គូបានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែន កាលពីឆ្នាំ២០២២។ EU រំពឹងថា ទ្រព្យសម្បត្តិនេះ នឹងផ្តល់ទិន្នផលប្រមាណ ១៥-២០ពាន់លានអឺរ៉ូ (១៦,៣០-២១,៧០ពាន់លានដុល្លារ) ជាប្រាក់ចំណេញ នៅត្រឹមឆ្នាំ២០២៧។

លោក Peskov បានប្រាប់សន្និសីទសារព័ត៌មានថា៖ «យើងអាចមើលឃើញថា ពួកគេកំពុងប្រយ័ត្នប្រយែង ព្រោះពួកគេដឹងច្បាស់ពីគ្រោះថ្នាក់ដែលអាចកើតមានពីការសម្រេចបែបនេះ និងផលវិបាកដែលអាចកើតមាន ចំពោះពួកគេដែលចៀសមិនរួច។ នោះហើយជាមូលហេតុដែលពួកគេបានទៅរកជម្រើសតូចជាងនេះ (ធៀបនឹងការរឹបអូសទ្រព្យសម្បត្តិទាំងអស់)។ ប៉ុន្តែសូម្បីតែជម្រើសតូចតាចជាងនេះ សម្រាប់យើង គឺស្មើនឹងការដកហូត ឬប្រើប្រាស់ទ្រព្យសម្បត្តិអ្នកដទៃ»។

លោក Peskov បានបញ្ជាក់បន្ថែមថា ទីក្រុងម៉ូស្គូនៅតែធ្វើការលើការឆ្លើយតបរបស់ខ្លួន ចំពោះវិធានការបែបនេះ ហើយនឹងតាមដានយ៉ាងដិតដល់នូវការអនុវត្តរបស់ប្លុកនេះ៕