រដ្ឋមន្ត្រីការបរទេសបារាំង នៅថ្ងៃពុធ (ទី២២ ខែឧសភា) នេះ បាននិយាយថា លក្ខខណ្ឌនានា ក្នុងការទទួលស្គាល់ប៉ាឡេស្ទីនជាផ្លូវការ ក្នុងនាមជារដ្ឋមួយ មិនទាន់ត្រូវបានបំពេញគ្រប់គ្រាន់នៅឡើយទេ ដែលការលើកឡើងនេះ កើតមានបន្ទាប់ពីរដ្ឋអឺរ៉ុបមួយក្រុមផ្សេងទៀត បានប្រកាសពីវិធានការបែបនេះ ដោយសង្ឃឹមថា នឹងជួយនាំមកនូវសន្តិភាពដល់តំបន់។

លោក Stephane Sejourne បាននិយាយនៅក្នុងសេចក្តីថ្លែងការណ៍មួយថា៖ «នេះមិនមែនគ្រាន់តែជាបញ្ហានិមិត្តរូប ឬជាសំណួរនៃគោលជំហរនយោបាយប៉ុណ្ណោះទេ ប៉ុន្តែជាឧបករណ៍ការទូត ដែលប្រើសម្រាប់ដំណោះស្រាយរដ្ឋ២ ដែលត្រូវរួមរស់ក្បែរគ្នា ប្រកបដោយសន្តិភាព និងសន្តិសុខ»។ លោកបានបន្ថែមថា៖ «បារាំងមិនបានចាត់ទុកថា លក្ខខណ្ឌនានាត្រូវបានបំពេញទាំងស្រុងសម្រាប់ការសម្រេចនេះ ដែលនឹងមានឥទ្ធិពលពិតប្រាកដលើដំណើរការនេះ»។

គួរបញ្ជាក់ថា នាយករដ្ឋមន្ត្រីលោក Jonas Gahr Stoere បាននិយាយនៅថ្ងៃពុធនេះថា ប្រទេសន័រវ៉ែសរបស់លោក នឹងទទួលស្គាល់រដ្ឋប៉ាឡេស្ទីនឯករាជ្យមួយ ខណៈដែលប្រភពនានា បានប្រាប់សារព័ត៌មាន Reuters ថា អៀរឡង់ និងអេស្ប៉ាញ ក៏នឹងប្រកាសពីការទទួលស្គាល់នេះផងដែរ៕