នគរបាលបានប្រាប់ឲ្យដឹងថា សមាជិកម្នាក់នៃគណបក្សកាន់អំណាចរបស់ប្រទេសបង់ក្លាដែស នៅព្រឹកថ្ងៃពុធ (២២ ឧសភា) ត្រូវបានរកឃើញថា ត្រូវបានគេសម្លាប់នៅក្នុងទីក្រុង Kolkata ប្រទេសឥណ្ឌា ដោយការប្រទះឃើញនេះ មានរយៈពេលជាង ១សប្តាហ៍ បន្ទាប់ពីជនរងគ្រោះបានបាត់ខ្លួន។

លោក Anwarul Azim Anar មកពីគណបក្ស Awami League ត្រូវបានគេរាយការណ៍ថា បានបាត់ខ្លួននៅថ្ងៃទី១៣ ខែឧសភា មួយថ្ងៃបន្ទាប់ពីបានទៅប្រទេសឥណ្ឌា ដើម្បីព្យាបាលជំងឺ។

យោងតាមសេចក្តីរាយការណ៍របស់ប្រព័ន្ធផ្សព្វផ្សាយនានា បានឲ្យដឹងថា នៅពេលដែលមិនអាចទាក់ទងឪពុករបស់ខ្លួនបាន កូនស្រីរបស់លោក Anar បានទាក់ទងអ្នកស្គាល់គ្នាក្នុងតំបន់ ដែលអាចជួយស្វែងរកទីកន្លែងនៅរបស់សមាជិកសភាបង់ក្លាដែសរូបនេះ។

របាយការណ៍បាត់ខ្លួនត្រូវបានដាក់ប្ដឹងនៅប៉ុស្តិ៍នគរបាល ក្នុងតំបន់ កាលពីថ្ងៃទី១៨ ខែឧសភា។ នគរបាលបាននិយាយថា បច្ចុប្បន្នការស៊ើបអង្កេតកំពុងដំណើរការ ខណៈមូលហេតុនៃអំពើឃាតកម្មនេះ មិនទាន់ដឹងនៅឡើយ៕