លោកប្រធានាធិបតី វ្ល៉ូឌីមី ហ៊្សេឡិនស្គី (Volodymyr Zelenskiy) កាលពីថ្ងៃពុធ (២២ ឧសភា) បានចេញការទទូចថ្មីមួយសម្រាប់ការធ្វើឱ្យប្រសើរឡើងនូវប្រព័ន្ធការពារនៃទីក្រុងនានារបស់អ៊ុយក្រែន ប្រឆាំងនឹងគ្រាប់បែកប្រើប្រព័ន្ធទូរបញ្ជា ដែលលោកបានពិពណ៌នាថាជា «ឧបករណ៍សំខាន់» ដែលឥឡូវនេះត្រូវបានប្រើប្រាស់ដោយទីក្រុងមូស្គូ ក្នុងការវាយប្រហាររបស់ខ្លួន។

លោក ហ៊្សេឡិនស្គី បានអំពាវនាវជាយូរមកហើយសម្រាប់ការធ្វើឱ្យប្រសើរឡើងនូវប្រព័ន្ធការពារដែនអាកាស ខណៈរុស្ស៊ី បង្កើនការវាយប្រហាររបស់ខ្លួនលើមូលដ្ឋានថាមពល និងហេដ្ឋារចនាសម្ព័ន្ធផ្សេងទៀត។ រុស្ស៊ីនិយាយថា ខ្លួនមិនមានចេតនាកំណត់ទីតាំងជនស៊ីវិលនោះទេ ប៉ុន្តែមនុស្សរាប់ពាន់នាក់ត្រូវបានសម្លាប់ និងរងរបួសចាប់តាំងពីការលុកលុយនៅខែកុម្ភៈ ឆ្នាំ២០២២ មកលើអ៊ុយក្រែន។

ថ្លែងនៅក្នុងសុន្ទរកថាវីដេអូពេលយប់របស់ខ្លួន លោក ហ៊្សេឡិនស្គី បាននិយាយថា អ៊ុយក្រែនមានការរីកចម្រើនក្នុងការអភិវឌ្ឍអាវុធអេឡិចត្រូនិក «ប៉ុន្តែក្នុងការទប់ទល់នឹងគ្រាប់បែករុស្ស៊ី យើងនៅតែត្រូវប្រឹងប្រែងបន្ថែមទៀត»។

កាលពីដើមខែនេះ លោក ហ៊្សេឡិនស្គី បាននិយាយថា រុស្ស៊ីបានប្រើប្រាស់គ្រាប់បែកប្រើប្រព័ន្ធទូរបញ្ជា ៣.២០០ គ្រាប់ប្រឆាំងនឹងគោលដៅរបស់អ៊ុយក្រែន ពេញមួយខែមេសា រួមជាមួយនឹងមីស៊ីលច្រើនជាង ៣០០ គ្រាប់ និងយានដ្រូនប្រភេទ ស្ហាហេដ (Shahed) ប្រហែល ៣០០ គ្រឿង។

រុស្ស៊ី បានងាកទៅប្រើគ្រាប់បែកទាំងនេះកាន់តែខ្លាំងឡើង ដែលត្រូវបានតម្រង់ទៅកាន់គោលដៅដោយប្រព័ន្ធទូរបញ្ជា មានសក្តានុពលបំផ្លិចបំផ្លាញដ៏ខ្លាំងក្លា និងបង្កហានិភ័យតិចតួចដល់អ្នកបាញ់៕