​បាល់ទាត់៖ ​ក្លិប​​អេ​ស្ប៉ា​ញ FC Barcelona បានឱ្យដឹងថា Lionel Messi នឹងមិន​អាច​នៅ​បន្ត​ជាមួយ​ក្លិប​បានឡើយដោយសារតែ​ច្បាប់​ហិរញ្ញវត្ថុ​របស់ La Liga​។ ​កីឡាករ​វ័យ ៣៤ឆ្នាំ​រូបនេះ​បាន​អស់​សុពលភាព​កិច្ចសន្យា​ជាមួយ Barcelona តាំងពី​ថ្ងៃទី១ ខែកក្កដា​។

​​អំឡុងពេល​បំពេញបេសកកម្ម​ជួយ​ក្រុម​អា​ហ្ស​ង់​ទីន​លើក​ពាន Copa America នៅ​ទឹកដី​អា​ហ្ស​ង់​ទីន​នោះ Lionel Messi ក៏បាន​យល់ព្រម​កិច្ចព្រមព្រៀង​បន្ត​កិច្ចសន្យា​ជាមួយ Barcelona ផង​ដែរ​កាលពី​ ២​សប្តាហ៍​មុន និង​យល់ព្រម​កាត់​ប្រាក់ខែ​ពាក់កណ្តាល​។ ​ភាគី​ទាំងពីរ Barcelona និង Messi បាន​សំដែង​ការ​សោក​ស្តែង​ចំពោះ​បរាជ័យ​នៃ​ការ​កិច្ចសន្យា​ថ្មី​នេះ​។​ ​កិច្ចសន្យា​ថ្មី​នេះ Messi យល់ព្រម​នៅ​ជាមួយ Barcelona ដល់​ឆ្នាំ២០២៦ តែ​តាម​គោល​ការ​ណ៍របស់ La Liga គឺ​តម្រូវឱ្យ Barcelona កាត់បន្ថយ​ប្រាក់​ចំណាយ​លើ​ប្រាក់ខែ​សរុប​ជាមុនសិន មុននឹង​អាច​ចុះហត្ថលេខា​ជាមួយ​កីឡាករ​រូប​ណាមួយ​បាន​បន្ថែមទៀត​។ ​​Lionel Messi គឺជា​អ្នក​ស៊ុត​បញ្ចូល​ទី​ច្រើន​បំផុត​ក្នុង​ប្រវត្តិសាស្ត្រ Barcelona ដោយ​រកបាន​សរុប ៦៧២គ្រាប់ ឈ្នះ​ពាន La Liga ១០លើក UEFA Champions League ៤លើក, Copa del Rey ៧លើក ក៏ដូចជា​ឈ្នះ​ពាន​ឯកត្តជន Ballon d’Or ៦លើក​ច្រើនជាងគេ​។​

​​រក្សាទុក Messi នៅ Barcelona គឺជា​គោលដៅ​របស់​ប្រធាន​ក្លិប​ថ្មី​លោក Joan Laporta ដែល​ជាប់ឆ្នោត​។ ​​កន្លងមក Messi ក៏​ធ្លាប់មាន​ទំនាក់ទំនង​ផ្ទេរ​ទៅកាន់ Paris Saint Germain និង Manchester City ផងដែរ ស្របពេល​ការផ្លាស់​ទៅកាន់​ទឹកដី​អាមេរិក Major League Soccer ក៏​ជា​ជំរើស​ផងដែរ​។​ ​​យើង​មិនទាន់​ដឹងថា Messi ពិតជា​ប្រាកដជា​ចាក​ចេញពី Barcelona រឺក៏​អត់​នៅឡើយ យើង​ចាំមើល​ដំណោះស្រាយ​បន្តទៀត​របស់​ភាគី​ទាំងពីរ Messi និង Barcelona ជាមួយនឹង La Liga៕

​អត្ថបទ​៖​នាង សុភា​វុ​ធ