មន្ទីរពេទ្យ សាមីទីវ៉េច ស្រីណាការិន (Samitivej Srinakarin)បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធ ទី ២២ ឧសភាថា មនុស្សជិត៦០ នាក់ រួមទាំងជនជាតិសិង្ហបុរី ៥ នាក់កំពុងទទួលការព្យាបាលនៅក្នុងមន្ទីរពេទ្យចំនួន ៣ ក្នុងទីក្រុងបាងកក។

អ្នកជំងឺចំនួន ២០ នាក់កំពុងត្រូវបានព្យាបាលនៅក្នុងបន្ទប់សង្គ្រោះបន្ទាន់ (ICU) នៅមន្ទីរពេទ្យចំនួនពីរ ខណៈ ៣៨ នាក់ផ្សេងទៀតកំពុងទទួលការថែទាំក្នុងបន្ទប់អ្នកជំងឺ។

ក្នុងចំណោមជនជាតិសិង្ហបុរីទាំង៥នាក់ដែលកំពុងសម្រាកព្យាបាលនៅមន្ទីរពេទ្យចំនួន៣ មាន២នាក់កំពុងសម្រាកព្យាបាលនៅក្នុងបន្ទប់សង្រ្គោះបន្ទាន់ ICU ។

អ្នកជំងឺបានរងរបួសនៅលើជើងហោះហើររបស់ក្រុមហ៊ុន Singapore Airlines (SIA) ដែលត្រូវបានវាយប្រហារដោយភាពច្របូកច្របល់យ៉ាងធ្ងន់ធ្ងរព្រោះខ្យល់បោកបក់ខ្លាំងពេក ពេលកំពុងហោះហើរកាលពីថ្ងៃអង្គារទី២១ឧសភា ពីទីក្រុងឡុងដ៍្រទៅកាន់ប្រទេសសិង្ហបុរី។ យន្តហោះបានចុះចតនៅទីក្រុងបាងកក បន្ទាប់ពីប្រកាសអាសន្នដោយសារមានអ្នករបួសច្រើននៅលើយន្តហោះ។

អ្នកជំងឺទាំង៥៨នាក់នេះត្រូវបានបញ្ជូនទៅព្យាបាលនៅក្នុងមន្ទីរពេទ្យចំនួន៣ ក្នុងនោះ ៤១នាក់នៅមន្ទីរពេទ្យ សាមីទីវ៉េច ស្រីណាការិន (Samitivej Srinakarin) ១៥នាក់នៅមន្ទីរពេទ្យ សាមីទីវ៉េច សុខុមវីត (Samitivej Sukhumvit) និង២នាក់នៅមន្ទីរពេទ្យបាងកក។

អ្នកជំងឺ ២៧ នាក់ត្រូវបានអនុញ្ញាតឲ្យចេញនៅម៉ោង ១ រសៀលថ្ងៃពុធ។ ក្រុមហ៊ុនអាកាសចរណ៍សិង្ហបុរីបាននិយាយថា អ្នកដំណើរ៥នាក់ដែលនៅលើយន្តហោះ SQ321 បានវិលត្រឡប់ទៅប្រទេសសិង្ហបុរីវិញកាលពីថ្ងៃពុធដដែល ខណៈសមាជិកអាកាសចរណ៍ម្នាក់ត្រូវបានកំណត់ឱ្យហោះហើរត្រឡប់ទៅប្រទេសរបស់ខ្លួនវិញនៅថ្ងៃព្រហស្បតិ៍នេះ៕