ប្រធានាធិបតីអេក្វាឌ័រ លោក ដានីញ៉ែល ណូបូអា (Daniel Noboa) កាលពីថ្ងៃពុធ (២២ ឧសភា) បានប្រកាសស្ថានភាពគ្រាអាសន្នថ្មីនៅក្នុងខេត្តចំនួន ៧ ក្នុងចំណោមខេត្តចំនួន ២៤ របស់ប្រទេស ដោយលើកឡើងពីការកើនឡើងនៃចំនួនអ្នកស្លាប់ដោយហិង្សា និងឧក្រិដ្ឋកម្មផ្សេងទៀតនៅក្នុងយុត្តាធិការទាំងនោះ។

វិធានការនេះនឹងចូលជាធរមានសម្រាប់រយៈពេល ៦០ ថ្ងៃនៅក្នុងខេត្ត ក្វ័រយ៉ាស (Guayas), ខេត្ត អ៊ែលអូរ៉ូ (El Oro), ខេត្ត សាន់តា អេឡេណា (Santa Elena), ខេត្ត ម៉ាណាប៊ី (Manabi), ខេត្ត ស៊ូគុមប៊ីអូស (Sucumbios), ខេត្ត អូរ៉េឡាណា (Orellana) និងខេត្ត ឡូស រីអូស (Los Rios) នេះបើយោងតាមក្រឹត្យដែលចុះហត្ថលេខាដោយលោក ណូបូអា ដែលកាលពីខែមករា បានប្រកាសថាប្រទេសអេក្វាឌ័រ ស្ថិតក្នុងស្ថានភាពសង្រ្គាម ហើយបានកំណត់ក្រុមឧក្រិដ្ឋជនចំនួន ២២ ជាក្រុមភេរវករ។

លោក ណូបូអា បាននិយាយនៅក្នុងក្រឹត្យនេះថា កងកម្លាំងសន្តិសុខនឹងអាចចូលទៅក្នុងលំនៅឋានប្រជាជន និងស្ទាក់ចាប់ខ្លួននៅក្នុងខេត្តគោលដៅដោយមិនបាច់មានការអនុញ្ញាតជាមុន។ លោកស្តីបន្ទោសអំពើហិង្សា រួមទាំងការវាយប្រហារកាលពីខែមករា នៅស្ថានីយ៍ទូរទស្សន៍ដោយខ្មាន់កាំភ្លើង និងការចាប់ចំណាប់ឆ្មាំពន្ធនាគារជាចំណាប់ខ្មាំង ទៅលើក្រុមឧក្រិដ្ឋជនគ្រឿងញៀន ដែលដឹកជញ្ជូនកូកាអ៊ីនពីប្រទេសកូឡុំប៊ី និងប៉េរូ ឆ្លងកាត់អេក្វាឌ័រ។

រដ្ឋាភិបាលនិយាយថា ការស្លាប់ដោយហិង្សា បានធ្លាក់ចុះ ២៨ ភាគរយនៅក្នុងខែដំបូងនៃឆ្នាំនេះ បើធៀបនឹងរយៈពេលដូចគ្នាក្នុងឆ្នាំ២០២៣ ប៉ុន្តែបានទទួលស្គាល់ថាឧក្រិដ្ឋកម្មផ្សេងទៀតដូចជាការចាប់ជំរិត និងការជំរិតទារប្រាក់បានកើនឡើងខ្លាំង៕