ប្រជាពលរដ្ឋនៅក្នុងរដ្ឋធានី New Delhi របស់ប្រទេសឥណ្ឌា កំពុងទប់ទល់រលកកម្ដៅដ៏ក្ដៅ ខណៈ សីតុណ្ហភាព បានហក់ឡើងលើសពី៤៥ អង្សាសេ ខណៈក្រសួងឧតុនិយមឥណ្ឌាបានព្យាករពីរលកកម្ដៅ ដែលនៅតែបន្ត។

យោងតាមក្រសួងឧតុនិយមខាងលើ រដ្ឋធានីឥណ្ឌាមួយនេះ បានកត់ត្រាថ្ងៃក្ដៅបំផុតរបស់រដូវនេះកាលពីចុងសប្ដាហ៍មុន ស្របពេលសីតុណ្ហភាពក្ដៅខ្លាំងបានហក់ឡើងដល់៤៧,៤ អង្សាសេ ។

បណ្ដារដ្ឋនៅជុំវិញរដ្ឋធានីនេះ រួមទាំង រដ្ឋ ហារីយ៉ាណា រដ្ឋពុនចាប រដ្ឋរាជាស្ថាន និងរដ្ឋឧតាប្រទេស ដែលត្រូវបានរងគ្រោះពីរលកកម្ដៅធ្ងន់ធ្ងរផងដែរ ស្របពេលរដ្ឋមួយចំនួនចេញការប្រកាសអាសន្នពណ៌ក្រហម ចំពោះកម្ដៅដ៏ក្ដៅនេះ។

ភ្ញៀវទេសចរម្នាក់និយាយថា សីតុណ្ហភាពពេលនេះពិតជាក្ដៅខ្លាំងណាស់ ពិសេសនៅចន្លោះម៉ោង១២ទៅម៉ោង៣ រសៀល ។ខ្ញុំពិតជាមិនអាចទ្រាំ បានឡើយ។

ចំណែកភ្ញៀវទេសចរម្នាក់ទៀត និយាយថា បើយើងប្រៀបសីតុណ្ហភាពនៅក្នុងរដ្ឋធានី New Delhi និងទីក្រុងកូលកាតា (Kolkata) សីតុណ្ហភាពនៅក្នុងរដ្ឋធានី New Delhi ខ្ពស់ជាង ។ សីតុណ្ហភាពនៅទីក្រុង កូលកាតា គឺចន្លោះពី៣៦ទៅ៣៨ អង្សាសេប៉ុណ្ណោះ។ ប៉ុន្តែនៅក្នុងរដ្ឋធានី នេះ វិញ សីតុណ្ហភាពឡើងដល់ប្រហែល៤៥អង្សាសេ ។

កាលពីជាង១០ឆ្នាំ មុន រលកកម្ដៅដ៏ក្ដៅនៅក្នុងតំបន់អាស៊ីខាងត្បូងមួយនេះ តែងកើតមានជាញឹកញាប់ ។ កម្ដៅដ៏ក្ដៅនោះ ក៏បានបង្កឲ្យមានវិបត្តិសុខភាពសាធារណដែរនៅក្នុងប្រទេសឥណ្ឌា ដោយមានមនុស្សជាង១៥០នាក់បានស្លាប់ ដោយសាររលកកម្ដៅនៅក្នុងប្រទេសនេះ ៕