សមាគមពាណិជ្ជកម្មថៃប្រចាំកម្ពុជា បានចាប់ផ្តើមរៀបចំពិព័រណ៍ពាណិជ្ជកម្មថៃ នៅសាល​ពិព័រណ៍​កោះពេជ្រ រាជធានីភ្នំពេញ ចាប់ពីថ្ងៃទី២៣ ដល់២៦ ខែឧសភា ឆ្នាំ២០២៤ ដែល​ស្តង់តាំង​បង្ហាញលក់ទំនិញនានាសរុបជាង ១០០ស្តង់ ក្នុងនោះក៏មានផលិតផលខ្មែរចំនួន ១០ស្តង់​ផងដែរ បានចូលរួមតាំងបង្ហាញលក់ និងស្វែងរកដៃគូពាណិជ្ជកម្ម។

លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃប្រចាំកម្ពុជា បានមាន​ប្រសាសន៍​ប្រាប់​ព័ត៌មាន ប៊ីធីវី ឲ្យដឹងថា ពិព័រណ៍ពាណិជ្ជកម្មនេះ រៀបចំឡើង​ក្នុង​គោល​បំណង​ដើម្បី​ជំរុញ​ការ​ធ្វើពា​ណិជ្ជកម្ម ការវិនិយោគ និងទំនាក់ទំនងខាងផ្នែកពាណិជ្ជកម្ម រវាងប្រទេសថៃ និ​ង​ប្រទេស​កម្ពុជា ជា​ពិសេស​ចង់​ឲ្យប្រជាជន​កម្ពុជា​មាន​ឱកាស​ជ្រើសរើស​ទិញ​ទំនិញ​ដែល​មាន​គុណភាព​ល្អ និងតម្លៃសមរម្យ និងជាវេទិកាសម្រាប់ពាណិជ្ជករថៃ និងពាណិជ្ជករកម្ពុជា ធ្វើ​ការ​ចរចា​ចាប់ដៃគូពាណិជ្ជកម្មជាមួយគ្នា ដើម្បីស្វែងរកមិត្ត​ដៃគូ​ពាណិជ្ជកម្ម​ក្នុង​ការ​ធ្វើ​អាជីវកម្ម​ជាមួយ​គ្នា​។

អ្នកស្រី ងី សុវណ្ណធីតា ម្ចាស់សហគ្រាស ស្វាយអង្គរ និងអ្នកស្រី លី ហួន ម្ចាស់សិប្បកម្ម លីហួន ហ្វូដ ដែលចូលរួមតាំងបង្ហាញលក់ផលិតខ្មែរក្នុងកម្មវិធីនេះ បានរំពឹងទុកថា នឹង​ទទួល​បាន​ការ​គាំទ្រ​ច្រើន​ពីសំណាក់អ្នកចូលរួម និងអំពាវនាវ​ឲ្យ​សាធារណជន​ទាំងអស់​ចូលរួម​ទស្សនា​ពិព័រណ៍​នេះ​ដោយ​ភាព​សប្បាយរីករាយ។ ជាពិសេសជួយគាំទ្រផលិតផលក្នុងស្រុកឲ្យកាន់តែច្រើនឡើងបន្ថែមទៀត ដើម្បីជាកម្លាំង​ចិត្ត​ដល់​ផលិតករ ជួយបង្កើតការងារជូនពលរដ្ឋខ្មែរ ក៏ដូចជាជំរុញសេដ្ឋកិច្ចឲ្យរីកចម្រើន។

សូម​ជម្រាបជូនថា ពិព័រណ៍ពាណិជ្ជកម្មថៃ រយៈពេល ៤ថ្ងៃនៅកម្ពុជា មានស្តង់សរុបចំនួនជាង ១០០​ស្តង់ ដោយមានដាក់បង្ហាញ និងលក់ទំនិញថៃ និងផលិតផលខ្មែរភូមិ១ ផលិតផល១ ជា​ច្រើន​ប្រភេទ មានដូចជា សម្ភារៈសំណង់ , ទំនិញម្ហូបអាហារនិងភេសជ្ជៈ , គ្រឿងសង្ហារឹម , សម្លៀក​បំពាក់ , ស្បែកជើង , គ្រឿងអលង្ការនិងត្បូងពេជ្រ និងវត្ថុអនុស្សាវរីយ៍ និង​តុប​តែផ្ទះ​ជាដើម​៕ អត្ថបទ៖ ឈិត បូរ៉ាវី