នៅថ្ងៃទី២៦ ខែឧសភា ឆ្នាំ២០២៤នេះ ការបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុកខណ្ឌ អណត្តិទី៤នឹងឈានចូលរមកដល់។ ក្នុង​ឱកាស​នេះ​បណ្តា​បេក្ខជន​ឈរ​ឈ្មោះ​ក្នុង​ការ​បោះឆ្នោត​នេះ បានបង្ហាញការប្តេជ្ញាចិត្តធ្វើជាតំណាងពលរដ្ឋ និងខិតខំ​អនុវត្ត​តួនាទី​ភារកិច្ច​សិទ្ធ​អំណាច​ខ្លួនលើការធ្វើសេចក្តីសម្រេចខាងបញ្ញត្តិ និងខាងប្រតិបត្តិ ជំរុញគណៈអភិបាលរាជធានី ខេត្ត ក្រុងស្រុក ខណ្ឌ អនុវត្តការអភិវឌ្ឍមូលដ្ឋាន និងផ្តល់សេវាឲ្យបានល្អ។

លោក​ជំទាវ នួន នារីតី បេក្ខភាពឈរឈ្មោះបោះឆ្នោតជ្រើសរើសក្រុមប្រឹក្សាខេត្តកណ្តាល បាន​ថ្លែង​ប្រាប់ BTV នៅថ្ងៃទី២៣ ខែឧសភានេះថា ក្រោយពីទទួល​បាន​បទ​ពិសោធន៍​ពី​ការ​ធ្វើ​ជា​សមាជិ​ក​ក្រុមប្រឹក្សាខេត្តកណ្តាល បានចំនួន៣អណត្តិមកនេះ នៅក្នុងអណត្តិថ្មីនេះ ក្រុម​ប្រឹក្សា​ខេត្ត​ទាំង​អស់គ្នានឹងបង្កើនការបំពេញតួនាទីភារកិច្ចខ្លួន ជាពិសេស​ខិតខំ​ធ្វើ​ជា​តំណាង​ប្រជា​ពលរដ្ឋ ប្រមូលយកបញ្ហាប្រឈម ការងារអភិវឌ្ឍន៍នៅតាមមូលដ្ឋាន យក​មក​ពីពិភាក្សា​ក្នុងកិ​ច្ច​ប្រជុំ​សាមញ្ញផង និងវិសមញ្ញផង ដើម្បីធ្វើសេចក្តីសម្រេចខាងបញ្ញត្តិ និង​ជំរុញ​ឲ្យ​គណៈ​អភិបាល​រាជ​ធានី ខេត្ត បុគ្គលិករដ្ឋបាលខេត្ត និងមន្ទីរជំនាញជុំវិញខេត្ត អនុវត្ត និងដោះ​ស្រាយ​បញ្ហា​ប្រឈម​ទាំងនោះជូនប្រជាជនក្នុងមូលដ្ឋាន។

លោកស្រី គង់ ច័ន្ទបុស្បា បេក្ខភាពឈរឈ្មោះបោះឆ្នោតជ្រើសរើសក្រុមប្រឹក្សាក្រុងតាខ្មៅ ខេត្ត​កណ្តាលថ្លែងថា នៅក្នុងក្រុងតាខ្មៅទាំងមូលមានគណបក្សនយោបាយចូលរួមចំនួន៤ ក្នុ​ង​មួយ​គណបក្ស​នយោបាយមានបេក្ខភាពឈរឈ្មោះចំនួន ២១នាក់ពេញសិទ្ធ និង២១នាក់បំរុង។ ក្នុង​នាម​ជា​បេក្ខភាពមួយរូបលោកស្រីបានប្តេជ្ញាអនុវត្តតួនាទី ភារកិច្ច សិទ្ធអំណាច​របស់​ខ្លួន​ឲ្យ​បាន​បំផុត​ធ្វើ​ជា​តំណាងប្រជាពលរដ្ឋ តាមដាន ត្រួតពិនិត្យ ការអនុវត្តការងារការអភិវឌ្ឍនៅមូលដ្ឋាន ផ្តល់សេវា និងដោះស្រាយបញ្ហានានារបស់គណៈអភិបាលក្រុងជូនដល់ពលរដ្ឋប្រកបតម្លាភាព និង​គណនេយ្យភាព។

សូមបញ្ជាក់ថា ការបោះឆ្នោតអសកលជ្រើសរើសក្រុមប្រឹក្សា រាជធានី ខេត្ត ក្រុងស្រុក​ខណ្ឌ​អាណត្តិទី៤ ឆ្នាំ២០២៤នេះ មានអ្នកបោះឆ្នោតដែលជាសមាជិកក្រុមប្រឹក្សាក្នុងតំណែងចំនួន ១១៦២២នាក់ ក្នុងនោះស្ត្រីមាន ២៥៧៤ នាក់ និងមានគណបក្សនយោបាយចំនួន ៥ រួមមាន គណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ្វ៊ុនស៊ិនប៉ិច និង​គណៈបក្សខ្មែររួមជាតិ៕ អត្ថបទ៖ ស៊ុម សុខជា