ប្រធានគណៈរដ្ឋមន្រ្តីជប៉ុន បាននិយាយនៅថ្ងៃព្រហស្បតិ៍ (២៣ ឧសភា) នេះថា ទីក្រុងតូក្យូ នឹង «ទំនាក់ទំនងដោយផ្ទាល់ និងច្បាស់លាស់» ទៅកាន់ទីក្រុងប៉េកាំង អំពីសារៈសំខាន់នៃការរក្សាសន្តិភាព និងស្ថិរភាពនៅច្រកសមុទ្រតៃវ៉ាន់។

លោក យ៉ូស៊ីម៉ាសា ហាយ៉ាស៊ី (Yoshimasa Hayashi) ប្រមុខអ្នកនាំពាក្យរដ្ឋាភិបាលរបស់ប្រទេសជប៉ុន ក៏បានប្រាប់សន្និសីទសារព័ត៌មានប្រចាំថ្ងៃថា វាជារឿងសំខាន់ក្នុងការធ្វើការជាមួយសហរដ្ឋអាមេរិក និងសម្ព័ន្ធមិត្តផ្សេងទៀត ដើម្បីបង្ហាញពីជំហររួមរបស់ពួកគេលើទំនាក់ទំនងចិន និងកោះតៃវ៉ាន់ ដើម្បីកាត់បន្ថយភាពតានតឹងក្នុងតំបន់។

ឯកអគ្គរដ្ឋទូតចិន ប្រចាំប្រទេសជប៉ុន លោក អ៊ូ ជាំងហាវ (Wu Jianghao) បាននិយាយនៅដើមសប្តាហ៍នេះថា ប្រជាជនជប៉ុន នឹងត្រូវអូសចូលទៅក្នុងអណ្តាតភ្លើង ប្រសិនបើទីក្រុងតូក្យូ ចូលរួមនៅក្នុងការប៉ុនប៉ងណាមួយដើម្បីបំបែកប្រទេសចិន បន្ទាប់ពីសមាជិកសភាជប៉ុន បានចូលរួមពិធីកាន់តំណែងមេដឹកនាំថ្មីរបស់កោះតៃវ៉ាន់ លោក ឡៃ ឆឹងទ័រ (Lai Ching-te)។

ការលើកឡើងរបស់ប្រទេសជប៉ុននេះ កើតឡើងនៅពេលដែលប្រទេសចិន បានចាប់ផ្តើមសមយុទ្ធ «ដាក់ទណ្ឌកម្ម» រយៈពេលពីរថ្ងៃនៅជុំវិញកោះតៃវ៉ាន់ នៅថ្ងៃព្រហស្បតិ៍នេះ នៅក្នុងអ្វីដែលខ្លួនបាននិយាយថាជាការឆ្លើយតបទៅនឹង «សកម្មភាពផ្ដាច់ខ្លួន» ដែលជំរុញឱ្យយោធារបស់កោះតៃវ៉ាន់ ប្រមូលផ្តុំកងកម្លាំងរបស់ខ្លួន៕