ព្រះវិហារ ៖ ក្រសួងអភិវឌ្ឍន៍ជនបទ ចាត់ទុកការអភិវឌ្ឍន៍ហេដ្ឋរចនាសម្ព័ន្ធផ្សេងៗនៅតាមជនបទ គឺជាការវិនិយោគដ៏ចាំបាច់ សម្រាប់ជួយ សម្រួលដល់ប្រជាពលរដ្ឋនៅគមនាគមន៍ ក៏ដូចជាការចូលរួមចំណែកលើកកម្ពស់ជីវភាពរស់នៅ និងការកាត់បន្ថយភាពក្រីក្រនៅជនបទ។ 

​ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ២៣ ខែ ឧសភា ឆ្នាំ ២០២៤ នេះ បានដឹកនាំប្រតិភូអន្តរក្រសួងចុះត្រួតពិនិត្យ វាយតម្លៃប្រគល់-ទទួលបញ្ចប់ជាស្ថាពររយៈពេលធានា សុពលភាព ការងារស្ថាបនាលូប្រអប់មុខបួនចំនួន ២ កន្លែង, លូប្រអប់មុខបីចំនួន ១ កន្លែង, លូប្រអប់មុខពីរចំនួន ៤កន្លែង, លូមូល មុខបីចំនួន ១ កន្លែង, និងលូមូលមុខពីរចំនួន ២កន្លែង ស្ថិតនៅភូមិអូរ ឃុំរបៀប ទៅភូមិពលកម្ម ឃុំរក្សា ស្រុករវៀង ខេត្តព្រះវិហារ។

ជុំវិញការស្ថាបនាលូខាងលើនេះ, លោកឧត្តមសេនីយ៍ទោ លឹម ចាន់ឬទ្ធី នាយករងនាយកដ្ឋានវិស្វកម្ម នៃក្រសួងការពាជាតិ លើកឡើងថា បន្ទាប់ពីបានគោលការណ៍ឯកភាពពីក្រសួងអភិវឌ្ឍន៍ជនបទរួចមក នាយកដ្ឋានវិស្វកម្មនៃក្រសួងការពារជាតិ បានអនុវត្តការងារនេះ ដើម្បីជួយសម្រួលដល់ប្រជាពលរដ្ឋក្នុងមូលដ្ឋាន មានភាពងាយស្រួលក្នុងការធ្វើចរាចរទៅមក ការដឹកជញ្ជូនកសិផល និង ដំណាំបន្ទាប់បន្សំរបស់ប្រជាពលរដ្ឋមកកាន់ទីផ្សារ និងជួយសម្រួលដល់សិស្សានុសិស្សធ្វើដំណើរទៅកាន់សាលារៀនជាដើម ជាពិសេសនារដូវទឹកឡើង ដើម្បីបង្កលក្ខណៈងាយស្រួលលើសេវាកម្មនានាដូចជា អប់រំ សុខភាព អនាម័យ ព័ត៌មានសិក្សាធិការ ជាដើម, ជាក់ស្តែងការងារស្ថាបនាលូទាំងនេះ បានអនុវត្តសម្រេចបានលទ្ធផល ១០០ ភាគរយ។

ទាក់ទិនកាស្ថាបនាលូនេះ, ឯកឧត្តម សាន វិសាល បានវាយតម្លៃខ្ពស់ ចំពោះការខិតខំប្រឹងប្រែងស្ថាបនា បញ្ចប់ជាស្ថាពរក្នុង រយៈពេលធានាសុពលភាព និងប្រកបដោយគុណភាព ព្រោះមិនថាផ្លូវ ឬលូឡើយ, សុទ្ធតែមានសារៈសំខាន់ និងផ្តល់អត្ថប្រយោជន៍ ដល់ប្រជាពលរដ្ឋជនបទ, ក្នុងនោះក្រៅពីការធ្វើដំណើរ និងការដឹកជញ្ជូនកសិផលផ្សេងៗ ការអភិវឌ្ឍន៍ជនបទគឺជាការជំរុញដំណើរ អន្តរកម្មផ្នែកសេដ្ឋកិច្ច និងសង្គមកិច្ចនៅជនបទ និងកាត់បន្ថយគម្លាតតំបន់ជនបទ និងទីក្រុងផងដែរ, ដែលកន្លងមក ក្រសួងអភិវឌ្ឍន៍ ជនបទ បានដាក់ចេញនូវគោលនយោបាយអភិវឌ្ឍន៍ ដោយមានគោលបំណងប្រែក្លាយតំបន់ជនបទនៃកម្ពុជា ឲ្យក្លាយជាតំបន់ អភិវឌ្ឍន៍រីកចម្រើន ប្រកបដោយបរិយាបន្ន និងមាននិរន្តរភាព។

សូមបញ្ជាក់ថា នៅឆ្នាំ២០២៤នេះ ក្រសួងអភិវឌ្ឍន៍ជនបទ នឹងបន្តរៀបចំផែនការយុទ្ធសាស្ត្រអភិវឌ្ឍន៍ជនបទរយៈពេល ៥ឆ្នាំ សម្រាប់ នីតិកាលទី៧ ឱ្យស្របទៅនឹងកម្មវិធីនយោបាយយុទ្ធសាស្ត្រដ៏ត្រឹមត្រូវ និងឆ្លើយតបទៅនឹងសំណូមពររបស់ប្រជាពលរដ្ឋ ព្រមទាំងលើក កម្ពស់ឧត្តមប្រយោជន៍ជាតិ ដើម្បីប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងមានចំណូលខ្ពស់នៅ ឆ្នាំ២០៥០៕ ដោយ ៖ ស៊ុន រ៉ាឌី