ក្រុមអ្នកជំនញ និយាយថា ប្រទេសចិន ដែលជាប្រទេសនាំចូលកសិកម្មដ៏ធំបំផុតរបស់ពិភពលោក បានដាក់គោលដៅកាត់បន្ថយយ៉ាងខ្លាំងនូវការពឹងផ្អែករបស់ខ្លួនលើការទិញពីបរទេស ក្នុងរយៈពេលមួយទសវត្សរ៍ខាងមុខ ស្របតាមការជំរុញរបស់ខ្លួនសម្រាប់សន្តិសុខស្បៀង ប៉ុន្តែពួកគេ នឹង ជួបការលំបាកយ៉ាងខ្លាំង។

ជាមួយនឹងដី និងទឹកមានកម្រិត ប្រទេសចិន នឹងត្រូវបង្កើនផលិតភាពកសិកម្មយ៉ាងខ្លាំង តាមរយៈបច្ចេកវិទ្យា រួមទាំងដំណាំដែលត្រូវបានកែប្រែពូជ និងពង្រីកផ្ទៃដីសម្រាប់ការដាំដុះ ដើម្បីបំពេញតាមការព្យាករណ៍រយៈពេល ១០ឆ្នាំរបស់ទីក្រុងប៉េកាំង។

យោងតាមឯកសារដែលបានចេញផ្សាយកាលពីចុងខែមេសា រដ្ឋាភិបាលរំពឹងថា គ្រប់គ្រាន់ដោយខ្លួនឯង៩២ភាគរយនូវគ្រាប់ធញ្ញជាតិ និងសណ្តែក នៅត្រឹមឆ្នាំ ២០៣៣ កើនឡើងពី ៨៤ភាគរយ អំឡុងឆ្នាំ ២០២១-២០២៣ ជាផ្លូវមួយឆ្ពោះទៅរកគោលដៅរបស់លោកប្រធានាធិបតី ស៊ី ជីនពីង ( Xi Jinping) ដើម្បីក្លាយជា «ថាមពលកសិកម្ម» នៅត្រឹមពាក់កណ្តាលសតវត្សរ៍នេះ។

ការកាត់បន្ថយការនាំចូលរបស់ប្រទេសនេះ នឹងក្លាយជាបញ្ហាមួយសម្រាប់អ្នកផលិតពីសហរដ្ឋអាមេរិក រហូតដល់ប្រទេសប្រេស៊ីល និងឥណ្ឌូនេស៊ី ដែលបានពង្រីកសមត្ថភាព ដើម្បីបំពេញតម្រូវការពីប្រជាជនចិនចំនួន ១,៤ ពាន់លាននាក់ ដែលជាទីផ្សារដ៏ធំបំផុតរបស់ពិភពលោកសម្រាប់សណ្តែកសៀង សាច់ និងគ្រាប់ធញ្ញជាតិ។

ក្នុងរយៈពេល ១០ឆ្នាំដល់ឆ្នាំ ២០៣៣ ក្រសួងកសិកម្ម បានព្យាករថា ការនាំចូលពោតធ្លាក់ចុះ ៧៥ភាគរយមកត្រឹម ៦,៨ លានតោន និង ធ្លាក់ចុះ ៦០ភាគរយសម្រាប់ស្រូវសាលី មកត្រឹម ៤,៨៥ លានតោន។